Go Sámi našunálateáhter buvttadišgođii Sven Henriksena “Mávssaheami” bihtá, de hásttuhit boares jurddašanmálle, mat muitaluvvojit vuostálasvuođa dilis, mii čuožžila báikegottážis go minerálaindustriija leavvagoahtá dohko.

Sven Henriksen (foto/govven: Aslak Mikal Mienna)
Sven Henriksen (foto/govven: Aslak Mikal Mienna)

Mánu geahčen čájeha Beaivváš Sámi Našunálateáhter ođđačállojuvvon teáhterbihtá maid Sven Henriksen lea čállán. Dan lea gohčodan “Mávssaheapmi”. Ná lohká bihtá čálli dan birra: “Eai gávdno álkis vástádusat riidduide mat gusket eamiálbmogiidda ja luondduriggodagaide. Lean geahččalan čájehit  movt “dábálaš” olbmui čuohcá go eallingeaidnu áitojuvvo heaittihuvvot, dan seammás go hásttuhan boares jurddašanmálle mii hehtte kultuvrra ovdáneami. Jus muhtin kultuvra bissu ovtta dásis, de boahtá jávkkodit áiggi mielde. Teaksta lea čállojuvvon ráhkisvuođain sámi kultuvrii, muhto lea oassi áigeguovdilis sáhkavuorus stuoraservodaga sisa báhkkemušaide hearkkes ealáhussii.

Mávssaheapmi, eatnasat buvttadusjoavkkus/Hevn, de fleste i produksjonen
Mávssaheapmi, eatnasat buvttadusjoavkkus/Hevn, de fleste i produksjonen

Buvttadusa guovddáš veahka

Teáhterhoavda Rolf Degerlund bagadallá bihtás, mas lea álgočájálmas Guovdageainnus golggotmánu 7. beaivvi. Earát leat šuokŋadahkki ja musihkar Roger Ludvigsen, Lávdehábmejeaddji Jan Öqvist ja bivttashábmejeaddji Hilde Skancke Pedersen. Bihtá neavttárat leat Anja Saiva Bongo Bjørnstad gii vuohččan lea neaktime Beaivvážis, Egil Keskitalo, Iŋgor Ántte Áilu Gaup, Mary Sarre, Anitta Suikkari ja Ingá Márjá Sarre, ja dasa lassin vel bihtá čálli Sven Henriksen guhte lea dego “Shakespeare” ieš mielde čájálmasas. Musihkka lea hui guovddážis, go Roger Ludvigsen ja Espen Høgmo čuojaheaba “live” čájálmasas.

Čájálmasmátki

Bihtáin johttit miehtá Sámi, sihke norgga, suoma ja ruoŧa bealde. Álgu lea Guovdageainnus golggotmánu 7. beaivvi ja loahpahuvvo Oslos,  Det Norske Teatret nammasaš teáhteris gaskkamuttus skábmamánu. Dás oainnát olles mátkki. Eanet dieđut čájálmasa birra, bileahttaoasttimat jna.

Mávssaheapmi seakti/Hevn teaser