Moadde vahkku dassái ledje dehálaš Norgga kulturpolitihkkárat Sámi Našunálateáhtera guossis. Ja dal finada fas dát guhte árvideames lea deháleamos kulturpolitihkkár. Teáhterhoavddas leat alla vuordámušat go dal kulturministtar ieš finada guossis.

(govven/foto: Aslak Mikal Mienna/Mona Lindseth/Venstre)

Guokte vahkku dassái finadedje olles čora dehálaš kulturpolitihkkarat, go Norgga Stuoradikki Bearaš- ja kulturkomitea galledii Sámi Našunálateáhtera, ea. ea. geahččan dihte makkár dilli teáhteris lea ruovttuviesustis, Kulturviesus Guovdageainnus. Nie beasai ge de teáhter čájehit komiteai lanjaid mat leat leamaš geavahusas 1981 rájes ja mat teáhter oainnu mielde eai lahkage doala dási dan ektui maid galggašii vuordit gávdnat teáhteris mas lea našunálateáhter stáhtus (geahča TV-ášši maid NRK Sápmi, Ođđasat sáddii áššis). Komiteas čohkkájit Stuoradikki politihkkara geat ovddastit bellodagaid guhte leat posišuvnnas muhto maiddái opposišuvnnas.

Ja dal, guokte vahkku maŋŋel, boahtá Norgga deháleamos kulturpolitihkkár, kulturministtar, Trine Skei Grande, fitnat guossis. Teáhterhoavda Rolf Degerlund illuda sakka. Ja sus lea vuordámušat, alla vuordámušat. Teáhter lea nu máŋgga jagi niegadan ja sávvan, ja bargan, oažžut iežas teáhtervisti, de lea ge erenoamáš movttiidahtti dákkár gussiid oažžut: “Komitea ja dal Kulturministtar čájehit na duohta beroštumi oahpásnuvvut min hástalusaiguin ja dárbbuiguin, mii vuosttamužžan lea oažžut doaimmalaš ja buriid lanjaid mat veahkehivččii teáhtera buvttadit alla dásset teáhtera, buori birrasis ja buriid eavttuiguin”.

Kulturministtar fitná teáhtera guossis disdaga njukčamánu 6. B.