Guđa geardde lea dulvi joksan teáhtera lávddi dan rájes go teáhter álggahuvvui 37 jagi dassái. Ja dal dán giđa de dát fas dáhpáhuvva. Teáhter čájeha Giđđadulvvi 7. geardde. Ráhkkanehpet humoristtalaš ja satiirralaš, eahpeformálalaš teáhterii revyhámis mii áigeguovdilis fáttáiguin čievččasta sihke bajás, duohko ja vel maiddái deike.

Giđđadulvi VII

Jurddaš, movt son livčče orrut Hammerfeastas gos buohcciviessu lea vázzima duohken? It dárbbaš veallat ambulánssas 5 diimmu dahje vásihit dan mii lea vel vearrát, darvánit Suoidneleakšái heitot dálkki geažil ja doppe válddihit obbalággá. Na de gal baicca lea mihá buoret oažžut albma obbalággá Hámmárfeasttas!

Rolf Degerlund, Knut Nærum

Na, fargga beasat earret eará dien birra gullat go dál lea Sámi Našunálateáhter Beaivváš hárjehallame čihččet giđđadulvi revyái masa humorista ja čálli Knut Nærum lea čállán teavsttaid. Ráhkkanehpet humoristtalaš ja satiirralaš, eahpeformálalaš teáhterii revyhámis mii áigeguovdilis fáttáiguin čievččasta sihke bajás, duohko ja vel maiddái deike. Bagadalli lea teáhterhoavda Rolf Degerlund.

 

Čihččet Giđđadulvvis beassat nu go ovddit Giđđadulvviin ge vásihit feara makkár árgabeaivválaš ja áigeguovdilis hástalusaid maid várra eatnasat dovdet dahje leat vásihan.

Álgočájálmas: cuoŋománu 27.b.  Alfreds Kro – Guovdageainnus. Čájálmasmátki finada de dain báikkiin: Álta – Olmmáivággi – Romsa – Ohcejohka – Deatnu – Oslo – Leavdnja – Kárášjohka

Dás leat eanet dieđuid.

Dá govat teakstabargobájis, čálli Knut Nærum, ovttas neavttáriin, bagadalliin ja musihkarin.