Teáhter lea dál bargamen guvttiin ođđa buvttadusain; namalassii "Stállu ja guovssahasa bárdni" mii lea čájálmas min buot nuoramus gehččiide. Nubbe buvttadus lea "Johan Turi" mii lea čájálmas dan birra movt girji "Muitalus sámiid birra" šaddá, ja álgočájálmas lea čakčamánus.

Neavttár Mary Sarre galga johtigoahtit muitaleaddjiskábiin ja sus lea mielde “Stállu ja guovssahasa bárdni” muitalus. Dát muitalusčájálmas lea jurddašuvvon daid boarraseamos mánáidgárddemánáide ja 1.- 2. luohká ohppiide. Muitalus lea davvi-sámegillii. Álgočájálmas lea Oscarshall:s Oslos, ja dát čájálmas lea oassi Sámi Našunalateáhtera skeaŋkas Dronnet Sonjai gii dán geasi devddii 80ot jagi.

Bagadalli: Rolf Degerlund.  Muitaleaddjiskábe: Bernt Morten Bongo.  Muitalusa čállit: Anstein Mikkelsen, Edit Flåten ja Anja Flåten.

Nubbe buvttadeapmi lea čájálmas “Johan Turi” man álgočájálmas lea Oslos, Det Norske Teatret lávddis, čakčamánu 6. beaivvi.

Lea čájálmas dan birra movt girji šaddá, ja čájálmas nieguid, fillehusa, eahpádusa, doalvvuheami ja gáhtama birra. Harald Gaski ja Gunnar Gjengset leaba čállán giehtačállosa, man Kristian Lykkeslet Strømskag ja Frank Jørstad leaba heivehan.

Neavttárat: Ingá Márjá Sarre, Iŋgor Ántte Áilu Gaup ja Egil Keskitalo.

Bagadalli: Frank Jørstad. Lávde- ja bivttashábmen: Even Børsum. Čuovgahábmen: Øystein Heitmann. Šuokŋadahkki: Johan Ericsson.