Jus leat pláneme geahččat ođđa Giđđadulvvi de gánnáha oastit bileahta dál juo, álgočájálmassii gal leat juo buot bileahtat vuvdon, muhto eará čájálmasaide lea vejolašvuohta oastit bileahtaid ovdagihtii. Ja dat leat hálbbibut neahtas go uvssas!

Giđđadulvi VII – Ingá Márjá Sarre, Anja Saiva Bongo Bjørnstad, Egil Keskitalo, Mary Sarre (duogábealde Rolf Degerlund ja Knut Nærum)

De dál ii leat šat beare guhka vel ovdal go beassat geahččat “Giđđadulvi VII”! Ja jus leat plánen vásihit dán ođđa Giđđadulvvi de gal gánnáha dál jo oastit bileahta. Ii fal dušše sihkkarastin dihte saji muhto maid danne go bileahtat máid vuovdit ovdagihtii, leat olu hálbbibut go dat máid vuovdit uvssas. Álgočájálmas – mii lea bearjadaga 27. b. – gal lea juo dievva, muhto lávvordatčájálmassii gal leat ain bileahtat.

Ovdagihtii oastimis leat bileahtat hálbbiduvvon 80 ruvnnuin. Haddi lea 220 ru neahtas ja studeanttaide ja vuorrasiidda 170 ru. Dát rievdá uvssas, de fertejit buohkat máksit 300 ruvnno, beroškeahttá leat go bargoolmmoš, studeanta vai vuorraskategoriija guossi.

Dáppe leat bileahtat vuovdemassii!

Giđđadulvi lea teáhterčájálmas revy hámis. Dán čihččet revyčájálmasveršuvnna (leat ovdal čájehuvvon guhtta, vuosttaš 1997as) lea norggabeale dovddus komihkar Knut Nærum čállán ja bagadalli lea teáhterhoavda Rolf Degerlund. Neavttárat lea Mary Sarre, Egil Keskitalo, Anja Saiva Bongo Bjørnstad ja Ingá Márjá Sarre. Mielde leaba maid Roger Ludvigsen, čuojaheaddjin ja Olav Johan Eira, teknihkarin.

Ráhkkanehpet humoristtalaš ja satiirralaš, eahpeformálalaš teáhterii revyhámis mii áigeguovdilis fáttáiguin čievččasta sihke bajás, duohko ja  deike. Ja oastte bileahtta fal dal jo!

Eanet dieđut Giđđadulvi VII birra ja dieđut gos čájehuvvo.