Pelle Njoammila čálli iluda sakka go dal fargga beassá oaidnit iežas njoammila simpume vuohččan teáhterlávddis. Issoras gal maid lea, go lea vuosttaš geardde čállán teáhterii. Beassážiid čájehuvvo sámi mánáide dovddus njoammil vuosttaš geardde.

Diibmá lei Sámi Našunálateáhter Beaivváš bidjan máilmmidovddus Pippi lávddi ala guoimmuhit  mánáid sámis. Dan jagi lea fas eanet báikkálaš oahpes karaktevra bargame dan seamma, namalassii Pelle Njoammil. Pelle Njoammil ja su eadni, čálli Karen Anne Buljo, leaba ge na vuosttaš geardde teáhterlávdái ollen, juoga mii addá sihke ilu ja balu, na goit čállái: “Dál, go Beaivváš lokte Pelle Njoammila lávdái, de lea munnje stuora dáhpáhus dieđusge. Mun dovddan dakkár lihkkodovddu. Dan seammás orro maid hui issoras go in han mun lean goassege čállán teáhterii ovdal eambbo oahppogazzamiid oktavuođas”, dadjá  Buljo.

Buorre ovttasbargu

Čállinbarggus dovdá čálli Karen Anne Buljo ahte lea leamaš buorre ovttasbargu teáhterin, go lea dovdan iežas bures boahtin. Erenoamážit rámida son čájálmasa bagadalli Anitta Suikkari: “Son lea duođai munnos Pelle Njoammiliin leamašan dorvun ja gáldogiisán dán oktavuođas.”.

Illuda oaidnit čovdojumiid

Dal go fargga čájálmas lea gearggus čájehuvvot, de son illuda geahččat mot su teaksta, su čálus, su muitalus, ovdanbuktojuvvo lávddis: “Illudan hirbmadit oaidnit dan ja mot sii leat čoavdán karaktevrraid gaskasaš gulahallamiid, dovdnemiid ja musihkka muđui. Illudan maid oaidnit  lávdebiktasiid. Go bihttá galgá čoavdit ieš guđet lágan máilmmiid de illudan oaidnit mot sii leat čoavdán dan ges. Dat ođđa áigi ja dološ áigi leaba bárgiduvvon oktii ja dan šaddá somá oaidnit lávddis”, dadjá Buljo.

Pelle Njoammila vuolggasadji

Karen Anne lea oahpaheaddji, muhto maiddái čálli, bajásšaddan sihke sis- ja riddu-Finnmárkkus. Son orru Álttás, lea čállán ja čállá eanemusat mánáide ja nuoraide, davvi-sámegillii. Pelle Njoammil lea gal ovdal oidnon, dahje eanet riekta, gullon, jietnaskearruin, jietnamuitalussan. Motivašuvdna čállit ea. ea. Pelle Njoammil muitalusa lea máŋggabealat: “Guhkit áiggiid lean bargan pedagogan sámi mánáide ja oaidnán sámi mánáid oarbbisvuođa iežaset kultuvrralaš semantihkka ektui, juste fal dan njálmmálaš árbevierus. De goit mearridin ahte mun galggašin maid duosttat čállit juogalágan jietnateáhtera sámi mánáide, mainna besset njálmmálaš árbevieru siskkáldas rámmaide. Go viimmat ledjen mearridan ahte dál galgá Pelle Njoammil riegádit, dakkár njoammil mii ii vealat ii ovttage máná ja boahtá go mánáin lea váivi.”

Sámi Našunálateáhtera Pelle Njoammil

“Pelle Njoammil ja Sáttomielli searat” lea namma Pelle Njoammil teáhterčájálmasas maid dal Sámi Našunálateáhter čájehišgoahtá fargga. Álgočájálmas lea beassážiid Guovdageainnus, gaskavahkku ovdal skilleduorastaga, 17.4.. Čájehuvvo de moddii Guovdageainnus, ovdal go de dolle čájálmasmátkái Sámis olles miessemánu ja loahpaha čájálmasráiddu Norgga oaivegávpogis. Čájálmasa bagadalli lea Anitta Suikkari ovttas Lars Göran Petterson:ain. Lea Anja Saiva Bongo Bjørnstad gii lea Pelle Njoammil ja su olmmái Risten Iŋgá lea fas Sarakka Gaup.

Dás leat eanet dieđut Pelle Njoammil ja Sáttomielli searat čájálmasa birra.

Dás lea fas Karen Anne Buljo “reive” teáhterii, čállon dal moadde vahkku ovdal álgočájálmasa. Su “reive” teáhterii lea ge vuođđun dán webáššis. 

Sarakka Gaup, Anja Saiva Bongo Bjørnstad