Johan Turi čájálmasmátki lea bistán juo badjelaš golbma vahku, ja dál leat ollen suomabeal Sápmái, ja boahte vahku leatges ruoŧabeal Sámis. Dán háve fitnát maid Čohkkirasas, mii lea dat guovlu gos Johan Turi orui ja gosa lea hávdaduvvon. Oallugat leat leamáš geahččame dán earenoamáš čájálmasa, mas geahččit besset vásihit veaháš earálagán ovdanbuktima. Čájálmasas leat sihke suohttasat ja maid duođalaš áššit, ja mii sávvat buresboahtima vásihit "Johan Turi" čájálmasa.

Johan Turi lea čájálmas dan birra movt olbmuid deaivvadeapmi sáhttá rievdadit eallima ja movt okta girji sáhttá rievdadit olbmuin oainnu ovtta álbmoga birra. Johan Turi niehku lea almmuhit girjji sápmelaččaid eallima birra, ja dan bokte maid eiseválddiide čilget sápmelaččaid eallima ja jurddašeami, nu ahte soitet rievdadit oainnus sámiid birra. Lea čájálmas nieguid, fillehusa, eahpádusa, doalvvuheami ja gáhtama birra.

Togamátkis deaivvada Turi fitnodathoavddain- ja gironlaččain Hjalmar Lundbohmain. Seamma mátkis lea maid dánskalaš dáiddár ja dutki Emilie Demant. Veahkeheaba go soai su?

Neavttárat: Iŋgor Ántte Áilu Gaup (Johan Turi), Ingá Márjá Sarre (Emilie Demant), Egil Keskitalo (Hjalmar Lundbohm)

Bagadalli: Frank Jørstad.  Lávde- ja bivttashábmejeaddji: Even Børsum. T-báiddit: StoorstålkaČuovgahábmejeaddji: Øystein Heitmann. Šuokŋadahkki: Johan Eriksson Degerlund. Luohtedahkki: Áilloš

Govvejeaddji: Johan Mathis Gaup

Čájálmasmátki