"Johan Turi" čájálmasmátki lea dál ollašuvvan, ja dat maŋemus čájálmasat ledje ruovttulávddis Guovdageainnus, gos čájehuvve guokte rabas čájálmasa ja guokte skuvlačájálmasa.

Maŋŋel álgočájálmasa, mii lei Oslos čakčamánu álggus, lea “Johan Turi” čájálmas johtán davásguvlui ja čájehuvvon ollu báikkiin sihke Norggabealde, Suomabealde ja Ruoŧabealde Sámis, ja oallugat leat leamaš geahččame čájálmasa mas beasaimet vásihit movt vuosttaš girji sámiid birra sámegillii šattái. Dál lea čájálmasmátki nohkán, ja dat maŋemus čájálmasat ledje Guovdageainnus. Mii giitit buohkaid geat bohte geahččat ja illudit fas fargga juogadit ođđa, gelddolaš ja somás vásáhusaid dinguin.