Teáhterstivrra čilge rabas reivvestis Norgga Kulturministarii ja Sámediggepresideanttai teáhtera heajos viessodili birra ja bivdá ministara ja presideantta ovttas guorahallat ja gieđahallat ášši.

Govven/Fotografert 27.4.2016, Jan Öqvist
Guohpa/Mugg, čáhceváttut/vannlekkasjer, Kulturviessu/Kulturhuset (photo: Jan Öqvist)

Dá lea Sámi Našunálateáhtera reive Kulturministarii Linda Hofstad Hellelandii ja Sámediggepresideanttai Aili Keskitalo, ollislaččat:

KRITIHKALAŠ BARGODILLI BEAIVVÁŠ SÁMI NAŠUNÁLATEÁHTERIS

Beaivváš Sámi Našunálateáhtera ođđa stivra ávžžuha dákko bokte riika eiseválddiid ja Sámedikki álgit meannudišgoahtit dan dohkketmeahttun, heajos ja várálaš bargodili mas teáhtera bargit fertejit bargat.

Ovddeš stivrrat ja teáhterhoavddat leat selehan logenar jagiid mielde ahte dat vistti gos teáhter lea, lea boaresáigásaš ja eahpevuogálaš. Dat eai leat heivvolaččat teáhterdoaimmaide ja bargobirasdilli lea dohkketmeahttun. Teáhterlávdi ii leat lahka ge dakkár mii heive ođđaáigásaš teáhterdoaimmaide, ja teáhterlávddi ja teknihkalaš ossodaga gaska lea dan mađe guhkes gaskka, mii dagaha lossa bargodili. Našunálateáhter kultur-Norggas ánssášivččii mihá buoret dili, gos galgá ássat, doaibmat ja bargat iežas dáidagiin.

Govven/Fotografert 27.4.2016
Guohpa/Mugg, čáhceváttut/vannlekkasjer, Kulturviessu/Kulturhuset (photo: Jan Öqvist)

Visti leat nu gollan ja seainnit leat nu láktasat, go nu máŋgii lea čáhci golgan sisa, ahte Bargobearráigeahčču lea árvvoštallan giddet visti. Bargit buhcet bargosajis, go vel teáhtergeahččit ge fertejit guođđit čájálmasaid  heajos sisáimmu geažil. Viessoeaiggádis ii leat ráđđi divodit visti. Aŋkke lea teáhter vuoitán sihke Hedda-bálkkašumi ja Árvvoštalliid -bálkkašumi dan maŋemuš jagi Vidas Extremas bihtá ovddas.

Ođđa teáhtervisti ektui čujuha stivra ahte ođđajagimánu 13. beaivvi 2014, sáddejuvvui ohcan ja govvádus ođđa, govttolaš teáhtervistái Guovdageidnui. Sámediggi lea dorjon prošeavtta. Stáda Kulturdepartemeantta ii leat vel vástidan, fargga golbma jagi maŋŋel, go ohcamuš lea sáddejuvvon,.

Mii bivdit Kulturministara ja Sámediggepresideantta ovttas guorahallat dili ja ráhkadahttit dássedis plána movt gieđahallat dan áigeguovdilis dili:

  1. Dás berre veardádallat doaimmaid movt gieđahallat dan várálaš dili. Dat ferte dáhpáhuvvat johtilit ja maid čađahuvvot almmá ájahallama.
  2. Dás ferte ráhkaduvvot oktasaš plána gaskkal stáhta ja Sámedikki movt dat guhkesáigge orrundilli galgá čoavdašuvvot.
  3. Ođđa teáhtervisti dili ektui čujuha stivra ahte ođđajagimánu 13. beaivvi 2014, sáddejuvvui ohcan ja govvádus ođđa, govttolaš teáhtervistái Guovdageidnui. Sámediggi lea dorjon prošeavtta. Stáda Kulturdepartemeantta olis ii leat vel vástidan, fargga golbma jagi maŋŋel, go ohcamuš lea sáddejuvvon.
  4. Stivra bivdá stáhta ja Sámedikki čađahit vejolašvuođaiskosiid dakkáraš prošektii gos Sámi joatkka- ja boazodoalloskuvla ja teáhter šaddet ovtta dáhki vuollai. Stivra oaivvilda ahte dat čuvge energiija aspeavtta, sihke fágalaččat ja doaimmalaččat. Dasa lassin geahpedit arvat oktasaš goluid. Goappeš bealit leabba ovtta oaivilis čađahit dán oktasašproseassa, jus dat čoavdá huksenproseassa.

Norggas leat guokte našunálateáhtera. Goappašagain leat stuora hástalusat mat gusket vistiide. Mii leat ilus go 2017 stádabušeahtta dieđiha doaimmaid dasa movt váidudit dili Nationaltheateris Oslos. Dál lea maiddái áigi geahčadišgoahtit dan duođalaš dili Beaivváš Sámi Našunálateáhteris.

Sii geat dal čohkkajit teáhtera stivrra leat:

Lene Hansen (stivrajođiheaddji)
Asta Mitkijá Balto
Inger Elin Kristina Utsi
Lars Magne Andreassen
Marit Karlsen
Stein Are Olsen
Olav Johan Eira

Kulturviessu/Kulturhuset, Guovdageaidnu
Kulturviessu/Kulturhuset, Guovdageaidnu