(C): Mienna Beaivváš

Heivego dánsut luohtái? Heivego juoigat dánsumii? Dán leat 22 Sámi beakkán juoigit, dánsejeaddjit ja artistat iskáme. Mot boađus? Bearjadaga 23. b. 2013 Kulturviesus Guovdageainnus dii. 1800 addo vástádus! Bures boahtin! Ea. ea. dát leat mielde: Wimme Saari, Inga Juuso, Lars Ante Kuhmunen, Elle Sofe Henriksen, Áilloš, Ola Stinnerbom, Anna Reetta Niemelä, Kenneth Ekornes, Leammuid Biret Rávdna, Nicko Buljo ja earát (geahča maŋemus siiddu, doppe oainnat buot oassálastiid).

Sámi Teáhter Searvvi, STS mearridii 2010 – 2013 doaibmaplánas lágidit Luohtelihkadus/ Yoikmovement symposia. Beaivváš Sámi Našunálateáter lea searvan mielproduseantan.

Luohtelihkadus/Yoikmovement: Ulbmilin lea ahte juoigit, dánsut, koreográfat, neavttárat lihkadanduogážiin ja musihkkárat juogadit fágalaš vásáhusaideaset, ja ovttas geahččaladdet ođđa vugiid luđiin ja lihkademiin/dánsumiin lotnolasat. Ii dušše danne vai dát ii jávkka, muhto maiddái vai ođđa dáidda- ja kulturovdanbuktimiid sáhttá hutkat. Ulbmilin lea ohcat ođđa luottaid luohtái ja lihkadeapmái/dánsumii.

Luohtelihkadus/Yoikmovement galggašii maiddái leat fágalaččat ávkin buot oasseválddiide ja movttiidahttit juohke dáiddára dahje dáiddárjoavkku dán vásáhusa joatkkabarggus atnit. Dákkár symposia sáhttá máŋgasiidda mearkkašit ahtanuššama ja gealboloktema. Dát vel nannešii fierpmádaga dáiddáriidda Sámis ja Davviriikkain muđui.

Ovddasvástideaddjit: Sámi Teáhter Searvi, STS, lea lágideaddji. STS:s leat guovttis konseaptta ráhkadan ja bargaba dainna. Iŋgor Ántte Áilu Gaup lea Sámis okta dovdduseamos juoigi. Son lea Beaivváš Sámi Našunálateáteris neavttárin ja lea STS` stivrajođiheaddji. Searvvi miellahttu Mette Brantzeg lea frilánsaregisøra, dramatihkkár ja koreográfa. Son lea doaimmahan máŋga čájálmasa Beaivvážis ja ovtta Giron Sámi Teáhteris. Mette lei prošeaktajođiheaddjin dan lihkostuvvi čállinkurssas ARIN Davvikalohkas, mas 8 dramatihkkára sámi ja mienkieli duogážiin čuvvo kurssa (2008-2010). Iŋgor Ántte Áilu ja Mette leaba Luohtelihkadus/Yoikmovement symposia fágalaš ovddasvástideaddjit.

Lágideapmi galgá leat 34. vahkus, borgemánu 19 beaivvis gitta 23 beaivái 2013. Symposia lágiduvvo Beaivváš Sámi Našunálateátera lanjain Guovdageainnus.

Doarjut: Luohtelihkadus/Yoikmovement lágiduvvo dáid doarjagiin: Norsk Kulturråd, Fond for utøvende Kunstnere, Dáiddafoanda, Ruoŧa beale Sámediggi, Norgga beale Sámediggi, Beaivváš Sámi Našunálateáter ja STS.

Prográmma Luohtelihkadus

 

(C): Mienna Beaivváš