Sámi Našunálateáhter juoigankonseartačájálmas Juoiggas! lea jo álgočájálmasa rájes  geasuhan olu gehččiid. Dal álgá geasuheaddji čájálmasa čájálmasráiddu loahppa oidnogoahtit.

Áilloš, Egil Keskitalo,Nils Henrik Buljo (govven: Aslak MIkal Mienna)

Sámi Našunálateáhtera juoigankonseartačájálmasas Juoiggas! lei sihke beroštumi ja gehččiidlogu dáfus dát buot buoremus čájálmasráiddu álgu. Sihke álgočájálmas ja nubbe čájálmas dalle Riksscenenis Oslos, gaskamuttus ođđajagimanus, ledje áibbas dievva ja geahččit liikoje maid oidne ja gulle. Ja dál sullii mánu maŋŋel oaidnit ge ahte dát mii dáhpáhuvai Oslo ii lean dušše soaittáhat, čájálmas lea dan rájes geasuhan olu olbmuid buot báikkiin gos lea leamaš. Scenekunst.no árvvoštalli liikui maid čájálmasa hui bures, dat soaitá ge maid čilget manin Juoiggas! geasuha (lea dárogillii).

Roger Ludvigsen, Mary Sarre, Egil Keskitalo, (Jakop Janssønn), Nils Henrik Buljo, Áilloš, Svein Schultz (govven: Aslak Mikal Mienna)

Loahpahuvvo fargga

Juoiggas! luohtekonseartačájálmas lea bures guoimmuhan gehččiid oalle viidát Sámis. Juoiggas! lea álggu rájes Oslos leamaš Troanddimis ja das maŋŋel máŋgga báikkis Davvi-Norggas. Dal daid beivviid (gaskamuttus guovvamánu) lea čájálmas vel finadeamen Anáris, Girkonjárggas, Johkamohkis ja Gironis, ovdal go čájálmasráiddu loahppa lea Guovdageainnus guovvamánu 22. B.. Dás oainnát dárkileappot gos čájálmas lea leamaš ja lea oaidnimis ja maiddái dieđut čájálmasa birra.

Čájálmagovat (govven: Aslak Mikal Mienna)