Nils Rune Utsi/SlinCraze, Mary Sarre, Anja Saiva Bongo Bjørnstad “Dá lean mun”/”This is me” (govven: AMMienna)

“Dá lean mun – This is me” lea čájálmas talkshowhámis. “Talkshowas” deaivvadit sámi rápparin SlinCraze (Nils Rune Utsi). Son oassálastá dávjá servodatdigaštallamis ráppa-musihkainis. Givssideapmi lea fáttá mii duos dása ilbmá su teavsttain. Ja dát lea ge maid guovddážis go ráppar muitala iežas vásáhusaid, dalle go ieš šattai gillát ja go dal ii šat dohkket dan, čájálmasas “Dá lean mun”/”This is me”. Neavttár Mary Sarre lea showa doalli. Dán musihkalaš talkshowas muitala SlinCraze iežas muitalusa, maiddái musihkain; ovttas musihkkáriin Roger Ludvigseniin son ráppe máŋgii. Vaikko čájálmas gieđahallá duođalaš fáttaid, de lea maid čájálmasa maid olu somá. Ja dieđusge, muhtin guossit maid, earret SlinCraze, ea. ea. Nils Rune Utsi ovddeš oahpaheaddji (neavttár Anja Saiva Bongo Bjørnstad bokte)

Álgočájálmas lei mannan čávča ja čájálmas lea čájehuvvon birrasit 40ot geardde ohppiide nuoraid- ja joatkkaskuvllain min davimus fylkkain. Maiddai Čáhcesullo giddagasas besse vásihit dán čájálmasa.

Sámi Našunálateáhter Beaivvážis eat dohkket givssideami ja hárdima. Mii fertet ovttas hehttet ahte givssideapmi bohciida ja ahte dat bissu. Givssideapmi ja árdin lea juoga mii čuohcá midjiide buohkaide, muhto ii dien váttisvuođa sáhte ovttaskas oahppi dahje boavji gálgat – dan ferte čoavdit servodagas; ovttasbargguin gaskkal ruovttu, skuvlla, skuvlaastoáiggeortnegiin, nuoraidklubbain, faláštallanjoavkkuin jna.

Giehtačálus: Rawdna Carita Eira, Nils Rune Utsi

Bagadalli: Rolf Degerlund

Neavttárat: Mary Sarre, Anja Saiva Bongo Bjørnstad, Nils Rune Utsi

Čuojaheaddji: Roger Ludvigsen

Lávdehábmejeaddji: Ole Thomas D. Nilut

Goarru: Ann Majbritt Eriksen

Čájálmasteknihkar: Olav Johan Eira

Gráfalaš hábmejeaddji: Kerstin Andersson

Promo govva: Pug Life Management/Lise Viktoria Tatiana

Fritt Ord lea dorjon čájálmasa ruđalaččat.

Preassagovat – govvejeaddji Aslak Mikal Mienna.