Sámi Našunálateáhter Beaivváš ja Árktalaš Fiilaharmoniija bovdeba dal ovttas komponisttain Frode Fjellheimain ja solista guovttuin Adrian Angelicoin ja Ulla Pirttijärvi-Länsmanin, "Beaivi, áhčážan. Eanni eannážan" álgočájálmassii, konseartačájálmas mas Áillohaš, Nils-Aslak Valkeapää, gudnejahttojuvvo dal 20 jagi maŋŋel su eretvádjoleami.

Áillohaš Nils Aslak Valkeapää (Beaivi áhčážan. Eanni eadnážan) – govven Harry Johansen ©

Konseartačájálmasas “Beaivi, áhčážan. Eanni, eannážan” áigut čalmmustahttit máŋga beali Áillohačča dáiddalašvuođas. Šaddá dieđusge ollu musihkka, sihke Áillohačča, muhto maiddai ođđa musihkka maid Frode Fjellheim lea ráhkadan. Solistat leaba mezzosoprána Adrian Angelico – guhte gullá norgga ođđa operalávluid bulvii guđet barget sihke našuvnnalaš ja riikkaidgaskasaččat ja Ulla Pirttijärvi-Länsman guhte lea okta otnáš njunuš sámi artisttain, son lea ea ea leamaš Romssa fylkkajuoigi.

Sámi Našunálateáhtera Beaivváža neavttárat Egil Keskitalo, Mary Sarre, Iŋgor Ántte Áilu Gaup ja Nils Henrik Buljo galget ovdanbuktit Áillohačča teavsttaid, mat leat válljejuvvon girjjis “Beaivi, áhčážan” -mainna vuittii Davviriikalaš girjjálašvuođabálkkašumi 1991:s ja girjjis mii lei dan bealálaš “Eanni, eannážan” – mii lei ge maid maŋemus girji mii almmuhuvvui go Áillohaš ain elii.

Multidáiddar Nils-Aslak Valkeapää (Áillohaš) lei sámegiela, sámi dáidaga ja sámi kultuvrra nanu ovddasteaddji, ja su barggut leat dehálepmosiid gaskkas, sihke dáiddalaččat ja servvodatlaččat, ja Áillohaš movttiidahttá ain oallugiid miehtá máilmmi. Son anii juoigama leat sámi klassihkalaš musihkkan. Iige dušše dan, maŋimuš komposišuvnnaidisguin son vikkai duođaštit mo luođi geavaheami sáhttá sulastahttit eará klassihkalaš musihkkii, sihke guhkkodaga, deattastemiid ja variašuvnnaid bokte.

Ja hui stuorra oassi su divttain leat dajahusat seammá áigge go dat leat gielalaš govat mat dahket jurdagiid friddjan ja suvvet daid girddašit. 

Álgočájálmas konseartačájálmasas “Beaivi, áhčážan. Eanni, eannážan” lea Bådåddjos, Stormen konseartaviesus 18.11. Dan maŋŋel čájehuvvo Romssa kulturviesus 19.11. ja maŋemus čájálmas lea Oslos, Operas, 21.11.

Eanet dieđut

Loga eanet dáppe čájálmasa birra. Dá ášši čállon beaivvas.no čájálmasa birra.

Áilllohaš čállii maid teáhterčájálmasa maid Sámi našunálateáhter buvttadii ja čájehii badjel máŋga jagi, leai Ridn oaivi ja nieguid oaidni čájálmas, dás dieđut vuosttaš buvttadeamis (2007, 2008, 2009) ja dá fas go nuppes buvttaduvvoi, 2013.