Elle Sofe lea bagadallán moadde oanehisfilmmas ja lea koreográferen máŋggaid čájálmasaid, maiddái teáhterčájálmasaid, muhto ii fal goassege bagadallan teáhterčájálmasa, na ii goit ovdal dal. Dál galgá Elle Sofe vuohččan bagadallat teáhterbihtá go dal Sámi Našunálateáhter čájeha vuosttaš sámegielat Pippi teáhterbihtá.
Elle Sofe Sara lea ámmát dánsejeaddji ja bargan koreográfan máŋggaid dánsen – ja teáhterčájálmasain. Lea maid bagadallan moadde oanehisfilmma, muhto ii teáhterbihtáid. Dál aŋkke sáhttá “merket” dan iežas bargun, go ávuin ja baluin dohkkehii vuosttas sámegielat Pippi teáhterbagadallanfálaldaga: – Oba somá. Mun han lean guhkká juo diehtán ahte galggan teáhtera bagadallat vuosttaš geardde, ja lean illudan dasa.
…maid don dál leat vuohon fuobmán, Elle
Go mii de álggiimet de mun ges šadden veahá balus, jurddašin “mo dát ges galgá mannat, Elle, maid don dál leat vuohon fuobmán”. Muhto dál go mii leat bargan oanehaš de dovddan ahte mun máhtán dán barggu, ja ahte ovttasbargu neavttáriiguin manná bures. De lean mun hui duhtavaš, dadjá Elle Sofe. Dánsenoahpu son lea váldán Londonis ja Oslos, ja lea koreograferen Sámi Našunálateáhtera ávvokonseartta «Jielemen Aavoe» mii buvttaduvvui Tråante 2017 ávvodoaluide.
Váivahuvvan…
Elle Sofe lea leamaš bagadallanveahkkin ja de beasai ge vásihit movt teavstta – giehtačállosa heiveha lávdái, dat mii su mielas lei stuorimus hástalussan bagadallanbarggus. – Mun jurddašin olu daid scenaid birra, ahte mo daid galggan “čoavdit” muhto dal dovddan ahte manná hui bures čoavdit daid scenaid. Dat lea vissa álo nu ahte lea mihá buoret álgit, ja oaidnit fysihkalaččat mo lea. Dalle oažžu ideaid ja jurdagiid mo ovtta scena sáhttá dahkat, dadjá Elle Sofe.
…ja illudan
Pippi-buvttadus álggahuvvui borgemánus, ja dat mii orui šaddamin Elle Sofe stuorimus hástalussan ii leat šat váivahuvvama veara, muhto baicca illun: – Hui somá oaidnit mo dat mii álggus dušše čuožžu báhpiris, mo dat ealáska ja šaddá juoga hui miellagiddevaš. Dego dakkár mánná gii stuorrula. Ja maid dieđusge leat olu somás fearánat hárjehallamiiguin. Somás ja ártegis dáhpáhusat maiguin mii reaškit issorasat. Dat lea maid somá dáinna bargguin, dadjá Elle Sofe mojohaladettiin.
Elle Sofe Pippi
Mii dovdet Pippi muitalusa ja várra muitit vuosttaš oaidnaleami Pippis, Tommis ja Annikas. Ja muitit Prusseluska ja dan guokte čuorbbes poliisabálvvá, ja ahte Pippi eallit orrot viesus. Ja sihkkarit maid dan guokte rievvára geat čađat geahččaleaba suoládit Pippis golleruđaid. Girjjit ja filmmat Pippi birra leat dovddusindahkan buot dáid fearániid. Sámi Našunálateáhtera Pippis, man Elle Sofe dál bagada, oaidnit máŋgasa dáin mihtilmas rollain ja sin fearániid, muhto bagadalli muittuha ahte dát lea “Pippi teáhter” iige “Pippi filbma”. Elle Sofes lea dánsejeaddjiduogáš, ja nu lea maiddái Marte Fjellheim Sarres guhte neaktá Pippi;. Dan gal mii fuobmát dakkaviđe go máilmmi gievrramus nieiddaš ihttá lávdái. – Mun dieđusge lihkon hui olu lihkadeami, ja dán bihtás gal neavttárat besset lihkadit olu, dadjá Elle Sofe.
Vuosttaščájálmas ja čájálmasmátki
Bearjadaga golggotmánu 5. beaivvi šaddá albma ge leahttu Villa Villakullas, go sámegielat Pippi vuosttaš geardde ihtá teáhterlávdái Guovdageainnu kulturviesus. Maŋŋel golbma eahkeda Guovdageainnus vuolgit čájálmasmátkái, ja sihke ábegáhttu, heasta ja villa leat mielde. Ja golleruđat, ja dieđusge maid ieš Pippi Nallesuohkku! Dás eanet dieđut. Buot govat áššis lea Aslak Mikal Mienna govven (kred.).
Govat vuolábealde čájehit Pippi čájálmasa buvttadusálggahančoahkkimis. Saltkråkan eaiggáda ja hálddaša buot rivttiid Astrid Lindgrena ja su girjjiid oktavuođas. Dás leat bileahtat oastimis.
