Ánte Siri bargá beaivválaččat diehtojuohkimin Sámi Allaskuvllas. Son gal ii eahpidan ja lohká gudnin jerrot! “Vuoi, jurddašin, dása gal ferten searvat. Mun lean beassan oaidnit Beaivváža čájálmasaid máŋggaid jagiid, ja dovddastan ahte lean muhtumin háliidan leahkit maid neavttárin. Ja de ožžon dan vejolašvuođa”. Mánát leat beassan illudit go Ánte lea leamaš mánáid Tv eanun NRK Sápmi sáddagiin máŋggaid jagiid. Dakko bokte fuomášii man somán leahkit neavttárin. “Mii han galgat dahkat issoras ja balddihahtti teáhtera, jurddašin dása gal searvvan go bessen vuos leahkit mielde vuosttaš deaivvadeamis earáiguin teáhteris. Mii logaimet giehtačállosa ja ságastalaimet bihtá birra, dal gal illudan álgit čakčat”. Teáhterbihtás lea su rolla Mihkkal gii lea okta sis guhto Blair Witch-Projeakta vuogi mielde duođai beassá vásihit ollu balddihahtti dáhpáhusaid. Govva: Ánte Siri, Haukur j. Gunnarsson ja Nils Rune Utsi. (Mienna/Beaivváš).
Nils Rune Utsi, dahje SlinCraze ráppejeaddji, lea ovttaoaivilis Ánttiin. Ja lasihastá ahte su ráppejeaddji doibmii lea dát hástalus nu ávkkálažžan go “mun áiggun bargat máŋggasuorggat dáiddáriin, ja neaktinbargu lea hui ávkkálažžan munnje dan ektui”, lohka Utsi. Ráppejeaddji SlinCraze lea juste dal bargamin “musihkkavideo-dáidagiin”. Son lea Jovsset teáhterbihtás, ja dovdá gamus gávdnan Jovsseha mihtilmas luonddu “go Jovsset lea hui eahpesihkar, soaitá veaháš árgi muhtin dilálašvuođain, muhto geahččala čiegadit iežas balu leaikkastalademiin”.
Elle-Máijá Tailfeathers lea Kanadalaš geas lea sihke sámi- ja blackfoot indiána sohkavuohta. Son neaktá Katja Silbajávrri bihtás, ja soaitá leahkit okta dain njealjis geas leat suollemas čiegusvuođat doppe Silbajávrri guovllus. Elle-Máijá lea debutánta neavttáriin sihke Beaivvážis ja muđui dán bealde Atlánta-ábi. Govva olggešbealde: Elle Máijá Tailfeathers (priváhta).
Njealját dáin nuorain lea Ingá Márjá Sarre, ja son gal lea ovdal máŋgii bargan Beaivvážis, maŋemuš lei Sáhpánat ja olbmot bihtás. Son lea Mia Silbajávrri teáhterbihtás. Suinna gal dađi bahábut ii soaitte mannat nu bures Silbajávrris. Govva gurutbealde: Ingá Márjá Sarre (Govvejeadjji: Marit Anna Evanger)
Anitta Suikkari, lei maŋemuš Giddagas bihtás Beaivvážis. Son neaktá ilgadis bahánihkkánas Sirina.
Beaivváža fásta neavttár Mary Sarre lea Márjá, dološáiggi leavggastat.
Egil Keskitalo lea maid Beaivváža fásta neavttáriin ja son lea ges Šombbár-Esko, gii lávddi alde oidnosta duollet dálle varrá ákšuin…
Dáiddalaš veahka:
Dramatihkar: Rawdna Carita Eira
Bagadalli: Haukur J. Gunnarsson
Lávdehábmejeaddji: Jon Kristian Alsaker
Bivttashábmejeaddji: Berit Marit Hætta
Čuovgahábmejeaddji: Øystein Heitmann
Komponistta: Håvard Lund
Govas oidnojit eanes olbmot geat leat seaguhuvvon čájálmassii.