Geassemánu bovde Davvi-Norgga feastaspeallu dáiddalaš, musihkalaš, teáhterlaš ja muđui ge kultuvrralaš doaluide Hárstták gávpogii. Ja doppe lea maid lunddolaččat Sámi našunálateáhter, dán háve Muohtadivggažat čájálmasain, ovttasbargobuvttadus Ferske scener teáhterkompaniijain.

Davvi-Norgga feastaspeallu, Festpillene i Nord-Norge fertii dieđusge diibmá, nu mot jo ge earát, šluhttet plánejuvvon spealuid, muhto beassá dal koronadili buorráneamis fas bovdet dáiddalaš ja kultuvrralaš doaluide doppe gos spealut leat lágiduvvon álgo álggus 1965 rájes, Hársttáin. Korona aŋkke an vuorja, go doaluin lea bileahtat/sajit olu unnit go leat dábálaš jagiin. Dieđusge lea maid Sámi našunálateáhter doppe, čájálmasain Muohtadivggažat, mii lea buvttaduvvon ovttasbargguin Ferske Scener teáhterkompaniijain. Dán čájálmasas lea álgočájálmas geassemánu 23. B., lávddis leaba Beaivváža neavttárat Marte Fjellheim Sarre ja Mary Sarre.

Muohtadivggažat

Máŋggagielat čájálmas jahketmeahttun ja duohta muitalusaid vuođul Norgga, Suoma ja Ruošša rádjeguovlluin. Ruošša rádji rahppojuvvui moatti mánnui ja sihke norgalaččat ja suopmelaččat bohte valvin suohtastallat. Loga eanet dás čájálmasa birra, dá lea Davvi-Norgga feastaspealu siidduin maid dieđut (dárogillii).