“Buorre beaivi ráhkis ustiban”. Nu fal, Áillohaš, bures dadjon. Ja nu dadjá ge maid Beaivváš Sámi Našunálateáhter do dal fargga guoimmuhišgoahtá ođđa čájálmasain “Bures dadjon”. Áillohačča sánit leat ge oassi čájálmasas maid dal Beaivváš fállá, muhto ii fal gal eará go soapmásiidda. Čájálmas lea dušše vuorrasiidda, penšunisttaide, min eallilan bulvii. Čájálmas čájehuvvoge de dasto doppe gos čájálmasa ulbmiljoavku lea dahje lunddolaččat čoaggana, boarrásiidsiiddain, ovddasmorašdáluin ja eará sullasaš visttiin.
Čájálmas ii leat dábálaš teáhterčájálmas, muhto eanet liekkus- ja guoimmuhanboddu. Čájálmasas, dahje bottus, leat oahpes šuoŋat ja lávlagat, máinnasteapmi, sátnevádjasat, divttát ja dat oktiibuot ovdanbuktojuvvo teáhtervugiin. Ea. ea. Áillohačča ja Rauni Magga Lukkari teavsttat gullojit, veaháš “voi-voi”, muhto gal fal juoga ođas maid ovdanbuktojuvvo.
Sii geat dal mátkkoštišgohtet dainna “bottuin”, leat neavttárat Egil Keskitalo, Mary Sarre, Iŋgor Ántte Áilu Gaup ja Ingá Márjá Sarre. Bagadalli lea leamaš Anitta Suikkari.
Vuorrasat Kárášjogas leat dát geat vuosttamužžan besset guoimmuhuvvot, go de leat min njeallje neavttárat doppe gaskkavahkku skábmamánu 25. B.. Das maŋŋel johtá Beaivváš eará sámi báikkiide Finnmárkkus, ovdal go de loahpaha Mázes juovlamánu 1. B..
Čájálmasmátki
| 25.11.09 | Vuosttáščájálmas/premiere Kárášjoga Boarrásiid dálus 2/Karasjok omsorgsbolig | dii. 13.30 |
| 26.11.09 | Buolbmát boarrásiidsiiddas/Polmak sykehjem | dii. 10:30 |
| 26.11.09 | Unjárga dearvvašvuođa guovddažis/Nesseby helsesenter, Nyborg | dii. 15:00 |
| 27.11.09 | Sámi giella- ja kulturguovddažis/Samisk språk- og kultursenter | dii. 12:00 |
| 30.11.09 | Guovdageainnu Dearvvašvuođaguovddažis/Kautokeino helsesenter | dii. 10:30 |
| 01.12.09 | Máze giliviessu/Máze grendehus | dii. 12:00 |
Čájálmasgovat
Govvejeaddji Aslak Mikal Mienna, krediteren gáibiduvvo preassageavaheamis, eará geavaheamis gáibiduvvo maiddái lohpi teátheris.
