Mátta-Várjjaga ja Nuorta-Finnmárku teáhter, Samovarteáhter, fitná Sami našunálateáhtera guossis ja mielde sis lea ođđabuvttaduvvon čájálmas mas lea  miellagiddevaš, dehálaš ja čihkkon máilmmesoahtehistorjá.

De som tapte freden – Samovarteatret

Samovarteáhter lea buvttadan teáhterbihtá soahteáiggi birra, guokte girjji leat leamaš vuolggasadji, Mennesker ved en grense” ja “Moskva kjenner ingen tårer”. Girjji historjjáid bokte háliidit sii bajidit partisánaid ráhččamušaid soađis, soađi mii dárai davvin ja daid lossa mearrádusaid maid olbmot dalle fertejedje dahkat.

Maŋŋel soađi leat beaggán historjját nu mot “Gutta på skauen” ja Max Manus, muhto unnán lea gullon soahtevuosttaldeami birra davvin.

Samovarteáhtera čájálmas “De som tapte freden” (“Sii guđet ráfi masse”) čájehuvvo Guovdageainnus, guossečájálmassan Beaivvážis, bearjadaga 22.11.2019, dii. 18:00. Bileahtta máksá 200 ru., dan sáhttá oastit ovdagihtii dáppe dahje uvssa dien beaivve. Čájálmasas lei vuosttaščájálmas lávvordaga golggotmánu 19. Beaivve.