30 jagi ráhčan buvttihii Sápmái ruovttuvuoittu!

Rolf ja bargoveahka ávvudit teáthervisti mearrádusa, 12.5.2020.

Lea leamaš illu, muhto eanemusat behttojupmi. Lea leamaš doarjja, muhto eanemusat jávohisvuohta. Leat leamaš lohpádusat, muhto ii goassege mearrádus. Áidna mii čađat lea leamaš 100 proseanta, lea garra áŋgiruššan. 30 jagi.

Odne 12.5.2020 beassá sámi servvodat ávvudit ahte golbmalot jagi rahčamuš viimmat lea buktán bohtosiid. Go ráđđehus dál lea várren 6 miljovnna ruvnno 2020:i reviderejuvvon našunálabušeahtas ođđa teáhtervisti oktavuođas de gal lea čielggas ahte šaddá teáhtervistti Guovdageidnui.

Dán jagi miessemánu 12. beaivi lea illubeaivi olles Sápmái, Norgii, Europái, jua – olles máilbmái! Mii leat dás, mii gávdnot, ja gávdnot agibeaivve. Dát visti lea buorre buohkaide, ja earenoamážit sidjiide geat háliidit ovdánahttit ja nannet giela ja identitehta, lohka teáhterhoavda Rolf Degerlund.

Teáhterhoavda Rolf Degerlund teáhtervisti viessosajis 12.5.2020! Govven Aslak Mikal Mienna

Dát lea stuora joavkovuoitu olles sámi servodahkii. Guokte buolvva leat neavttárat, teáhterhoavddat, bargit, stivralahtut, servodathuksejeaddjit ja sámi politihkkárat ráhčan dan ovdii ahte Norga hukse sámi teáhtervisti. Dál beassat buohkat ávvudit dán vuoittu. Ja mun vuoššastan liema ávvojuhkosiin, lohka Sámi Našunálateáhtera stivrajođiheaddji Lene Hansen.

Maŋemus jagiid lea Sámi Našunálateáhter Beaivváš čávgen barggu našunála politihkalaš eiseválddiid ektui ollašuhttin dihte teáhtervisteprošeavtta. 2020:i stádabušeahtas lohpidii dalá kulturministtar Trine Schei Grande ovddidit ášši reviderejuvvon bušehttii, Stuoradiggi nannii dán go bivddii jođánis ja konkrehta ovdáneami.

Preassadieđáhusas čállo “…ráđđehus várre 6 miljovnna ruvnno 2020:s vai bargu oktasaš visttiin ovdána Sámi Joatkkaskuvlii ja boazodoalloskuvlii ja Sámi Našunálateáhterii Guovdageainnus”. Ja go ráđđehus juolluda ruđa prošekteremii mearkkaša dat, ahte visti galgá šaddat duohtan.

Mii áigut boahttevaš vahkuid bargat dan ovdii ahte Stuoradiggi mearrida dán plána ja ahte huksenbarggut álggahuvvoše juo 2021 giđa. Dasa lassin áigut aktiivvalaččat oassálastit prošekteremis, lohka teáhterhoavda Degerlund.

Visti lea dehálaš, muhto buot deháleamos lea maid mii buvttadit visttis. Dat gal šaddá vitamiidna lávdedáidagii, giellaovdánahttimii, sámi muitalanillui, vásáhusaide mat čohkkejit, lohka stivrajođiheaddji Lene Hansen.

Dieđut

  • Sámi Našunálateáhter Beaivváš álggahuvvui 1981
  • Teáhtera deháleamos bargu lea giela ja identitehta ovdánahttit. Teáhteris leat 22 bargi ja doaibmabušeahtta lea birrasiid 23 miljovnna ruvnno.
  • Vaikko dálá gáržžes ja gáibideaddji bargobiras buktá hástalusaid de leat teáhteris goitge ollu geahččit miehtá riika ja lea maid ožžon bálkkašumiid barggu ovddas.
  • Ođđa teáhtervistti galgá huksejuvvot Guovdageainnus, ja ođđa ruovttošiljus lea mihttomearri lasihit sihke buvttaduslogu ja čájálmaslogu miehtá Norggas.

Teáthervistti viessosadji, 12.5.2020. Govven Aslak Mikal Mienna