auringon_poika_2014-5228Aittobáliid loahpahii Beaivváš Áillohačča “Ridnoaivi ja nieguid oaidni” bures menestuvvon čájálmasa, mii čájehuvvui miehtá Suoma ja Norgga ja loahpahuvvui Jáhpanis. Muhto ii das galle, eat guođe gal vel Áillohažža; boahtte mánu lea Beaivvážis ovttasbargu Suoma Našunálateáhterin ja Ruska teáhterjoavkkuin gudnejahttojuvvon Suoma dramatihkara Ari Pekka Lahti ođđačállojuvvon teáhterbihttá Áillohačča eallima ja bargguid birra. Gurut bealde lea čálli ja bagadalli Ari Pekka Lahti ja su miel-bagadalli ja koreográfa Hanna Brotherus – buot govaid kred. lea Mienna/Beaivváš, deaddil gova ja prentensturrosaš ihttá).

“Beaivvi bárdni”

“Hearkkes ja áibbašeaddji bárdni boazodoalu birrásis, bajásšaddá davimus Suomas. Áiggi mielde šaddá son ge bargagoahtit boazodoalu árbevirolaš bargguid, muhto go son galgá goddit vuotnjala, de biehttala dahkamis dan“. Nie dat álgá. Loga eambbo dás gos maid lea čájálmasmátki,  ja geat leat mielde, sihke dáro- sáme- ja eŋgelasgillii. Ja de, dáppe leat fas dieđut viežžamis suomagillii.

Máilmmiálgočájálmas ja dasto čájálmasmátki

Álgočájálmas lea Suoma Našunálateáhteris Helssegis sámiid našunálabeaivvi guovvamánu 6. beaivvi . Doppe čájehuvvo lagabui mánu, ovdalgo vulget johtit davás, gos vuosttažiin čájehuvvo Pajalas 21.3.  Dan maŋŋel čájehuvvo: Eanodagas, Romssas, Olmmáivákkis, Guovdageainnus, Kárášjogas, Ohcejogas, Deanus, Vuonnabađas, Aanaaris,  Oulus, Roavvenjárggas ja fas Guovdageainnus beassážiid. Dá lea čájálmasplána.

Beaivváža oassi

auringon_poika_2014-5231Beaivváža oassi dán bihtás leat earret eará guokte neavttára ja okta teknihkar: Teáhtera neavttárguovttos Mary Sarre ja Iŋgor Ántte Áilu “Áilloš” Gaup lávdde- alde, ovttas Jarkko Lahtin ja Tiina Weckstrømain. Diet njealjis (geat dá leat govas), galget sihke sáme- ja suomagillii ovdanbuktit Ari Pekka Lahti čállosa, mii  galgá ovtta ládje sihke govvidit ja gudnejahttit Áillohačča. Nu go Lahti ieš čállá; “dát ii galgga leahkit historjjálaš- biográfalaš bihttá, muhto eambbo vuoiŋŋalaš govvehus dáiddáris gii bargá garrasit  iežas dáidaga ovddas gitta eallima loahpageahčái.

Vuđolaš bargu

Ari Pekka Lahti, gii gurut ravddas bagadallá neavttára Jarkko, duo govas vuolábealde, lea čállán bihtá earret eará go lea jearahallan olbmuid geat dovde Áillohačča, muhto maid go lea gažadan dutki Marjut Aikio, gii vuđolaččat lea dutkan Áillohačča eallima: “Son lea dutki vugiin dutkan Áillohačča, son ii leat mange eará ládje čatnon sutnje”. Muđui čilge Lahti ahte “…Marjut Aikio diehttelasat gudnejahttá Áillohačča mávssolaš dáiddáriin, su viesus leat skábiid dievvá báhpirat, reivvet ja eará diŋggat Áillohačča eallima ja bargguid birra, ja go mun deaivvadin suinna, de bođiime dakkaviđe sáhkalagaid, ja mun dovdan ahte dát lea nu movt galgá”. Lahti lea suoma dramatihkar ja teáhterbagadalli, guhte 3 maŋemus jagiid lea jođihan Ruska teáhterjoavkku, unna teáhterjovkkoš Kokkolas, ovttas Jarkko Lahtin gii neaktá dán čájálmasas.

auringon_poika_2014-5224