80 loguin jođihii Marry Ailonieida Somby Sumara dohkáteáhtera. Son čálii máidnasiid, nugo Stáinnak. Maŋŋel čájálmasmátkkiid dahkkui TV veršuvdna Stáinnahis. 30 jagi maŋŋel áigu Beaivváš ges čájehit dan iežas lávddis. Dán vuoru ii fal dohkáid hámis, muhto 5 ealli neavttáriiguin.
Somby lea hui movttet ja duhtavaš go Beaivváš áigu bargagoahtit čájálmasain ja mot bagadalli Victoria Kahn áigu dulkot dan. Vuosttáš čájálmas lea guovvamánu 10 beaivvi 2012. Mánát gal liikojedje dohkáveršuvdnii dalle ja mun leat áibbas sihkar ahte doaibma lihka bures albma lávddis, lohka Somby, gii maiddái deattuha bihtá váldoulbmila. Čájálmas čállui dalle Álttá-Guovdageainnu eanu dulvadeami vuostálastima geažil , dahje njuolgut juo vuostemiellačájáhussan, lohká son. Son lei ieš maid mielde vuostálastin ákšuvnnain. Čájálmas lea hui dramáhtalaš – mii sihke suorggahatta ja guoimmuha, lohka Somby, muhto bihtás lea ulbmil čájehit vuostehágu luonddu billisteapmái ja veagahuvvamii (deaddil gova ja stuorit ilbmá – kred: Beaivváš/Mienna).
Stáinnak – dramatihkalaš mánáidčájálmas
Beaivváš lea dán jagi juo čájehan ovtta mánáidčájálmasa, namalassii Čakkalaggen, mii lea dárogielat veršuvdna ráhkaduvvon skuvlamánáid váras. Dál lea fas mánáide čájálmas, muhto fal rabas čájálmas sámegillii. Nu go Čakkalaggen, de lea Stáinnak bihtás maid “eatnanvuložat” mielde, nugo ulddat ja stálut ja vilges noaideboazu – Stáinnak – mii lea ulddaid lihkkoboazu.
Ja dan birra lea máinnas:
Ulddaid boazu Stáinnak šaddá dáhpedorpmis olbmuid ja elliid máilbmái, ja álgá guohtut boasttu sajes ja boasttu áiggis. Stáinnak deaivvada Rohttupolitiijain gii bidjá Stáinnaha butkái. Alit ja Ruksesoambealášguovttos geat leabba Stáinnaha buoremus ustibat áiggošeigga veahkehit su, juoga mii ii leat nu álki. Gájudettiin gávnnadeaba Alit ja Ruksesoambealaža guovttos sihke siivus ja bahás karakteraiguin. Soai beassaba maid gullat ahte muhtiinat leat álgán huksegoahtit atomarusttegiid ja vel vearrábut áššiid. Ulddaguovttos šaddá dramáhtalaš mátki sihke albma máilmmis ja eatnanvuolážiid máilmmis. Ja mihttomearri lea gádjut Stáinnaha, muhto Rohttupolitiija ja Jurratruolla gal eaba liiko dasa.
Sii geat leat mielde:
Ruoŧalaš Victoria Kahn lea bagadalli ja nubbi ruoŧalaš Sara Kander lea lávdehábmejeaddji ja bivttashábmejeaddji. Roger Ludvigsen hábme musihka, Bernt Morten Bongo lea čuovgahábmejeaddji. Sii geat leat lávddis leat Beaivváža iežas Egil Keskitalo, Áilloš ja Svein B. Olsen, neavttárat muđui leat Sarakka Gaup ja Leammuid Biret Rávdna. Vuosttáščájálmas lea guovvamánu 10. b. 2012 Guovdageainnus, maŋŋel dán johtá čájálmas mátkis miehta sámi, ja de loahpa čájálmasaiguin beassažiid Guovdageainnus (govva dás gurutbealde lea Sara Kander tevdnen, lea karaktera Gerpmena biktásat – deaddil gova ja stuorit ja prentensturrosaš govva ilbmá – kred. Sara Kander/Stáinnak/Beaivváš).