Dál ii leat eará go vahkku vel dassážii go Nils Gaup musikála ja bearaščájálmas Guovssahasa hálddus čájehuvvo vuosttaš geardde. Ja go jo koronadilli lea rievdan buoret guvlui, de besset Elin K. Oskal ja muđui čájálmasa vihtta neavttára dal neaktit ja lávlut čájálmaslanjain gos geahččit čohkkájit buot stuoluin.
Dál ii leat šat eará go heivehit buot osiid gárvvisin, ja de vahku geahčen leat mii válbmasat čájehit min goalmmát álgočájálmasa min ávvojagis. Ja go dál rahpat uvssaid gehččiide de lea viimmat vejolašvuohta deavdit buot sajiid, ja mii sávvat ge sihke mánáide, nuoraide ja rávisolbmuide váimmolaš bures boahtima vásihit min bearašmusikála «Guovssahasa hálddus».
Lea Nils Gaup guhte lea čállán muitalusa «Guovssahasa hálddus». Son lea bajásšaddan Guovdageainnus dan áigge go TV ii vuos geasuhan olbmuid nu bearehaga , dalle go lei eanet dábálaš čoahkkanit guldalit go čeahpes muitaleaddjit muitaledje sihke gelddolaš, imašlaš ja muhtomin maid oalle issoras muitalusaid ja fearániid. Ja lea ge okta dain muitalusain man son gulai dalle mánnán, namalassii “Bártnáš guhte hárddii guovssahasa”, mii lea vuođđun su muitalusas “Guovssahasa hálddus”.
Guovssahasa hálddus:
Dán muitalusadáhpáhus lea 2021:s muhtin bearraša luhtte gos lea eadni, áhčči ja máná guovttos Mikko ja Áidna. Sis leat ieš guđet lágaš buđaldepmošat. Áidna berošta sosiála mediain, iige fuobmá go Mikko hárdigoahtá guovssahasa, vaikko áhkku lei dáguhan sudnuide ahte dan ii galgga dahkat! Guovssahas dohppe Mikko iežas háldui. Áidna dan áicca ja geahččališgoahtá beastit su. Muhto dađi bahábut geavvá nu go láve geavvat sámi árbevirolaš muitalusain, ja muđui eallimis, ahte ollu hehttehusat šaddet ovdii. Besten dihte vielljas gártá Áidna hástalusaid sisa, ja ferte birget buoremus lági mielde. Dás leat somás dáhpáhusat, ja veaháš issorasat maiddái, muhto ii go son goitge mana bures!
Son gii neaktá unnavieljaža Mikko, ja máŋga eará rolla, lea nuorra sámi artista Elin Oskal. Marte Fjellheim Sarre neaktá stuoraoappá Áidna. Egil Keskitalo neaktá áhku beatnaga, Čalmmo. Iŋgor Ántte Áilu Gaup neaktá Jiehtanasa.Neavttárat muđui leaba Nils Henrik Buljo ja Mary Sarre geat neaktiba máŋgga iešguđetlágan rollas.
Bearjadaga golggotmánu 8.b. lea álgočájálmas Guovdageainnus. Čájehuvvo maid Kárášjogas, Deanus, Álttás, Olmmáivákkis, Romssas, Anáris, Vuohčus ja Girkonjárggas.
Dás eanet dieđut ja preassagovat viežžamis, čájálmasa birra. Dáppe leat bileahtat vuovdemassii.
Buot čájálmasgovaid lea Johan Mathis Gaup govven.
