Go Mary Sarre guoimmuha Gába čájálmasas, de dáhpáhuvvo sihke musihkain ja suohtastallamin. Ja nissonolbmuid čiegusvuođaiguin. Ja diehttelasat maid fávrros dievdduiguin, muhto go sin álgá guorahallát, de eai aŋkke anit masage. Bures boahtin Áhku Power ironalaš máilbmái, mii govvida suohttasiid ja bárttiid min eallimis.
Go Mary Sarre galgá guoimmuhit min ođđa Gába čájálmasas, de lea lávlun, musihkka ja suohtastallan guovddážis. Sus leat maid guokte eará nisson “karaktera” mielde dán suohtas bottožis – Rávdná ja Gájjá. Soai leabba guokte davvinorgalačča geat leabba válljen goabbatlágaš eallingeainnu. Gájjá lea šaddan beakkán neavttárin, ja Rávdná ges lea válljen joavkkuin ja ruovttubargguiguin livžžodit. Vaikko sudnos lea ge veaháš goabbatlágan eallin, de leabba aŋkke muhtin ládje ovttalágažat. Nu go eanas nissonolbmuin leat doaimmat, de leat sudnos maid nu go ovdamearka dihte navvit, čalbmeguolggaid guhkidit, siliikona dahje botox buđaldeamit. Ja diehttelasat dat niehku, ahte fiškalit dan rievttes olbmá ja daid návccaid bidjat gávdnat su, muhto go de ipmirdišgoahtá ahte ii ábut nu ránttostállat, ja baicca ohcagoahtit dobbelis.
Sámi Našunálateáhter ja neavttár Mary bovde ge dákko bokte suohtas guoimmuheaddji Gábačájálmassii. Ja ironalaš čájálmassii. Mii čájehuvvo vuohččan beassážiid 2016, njukčamánu 23.b. – dá olgešbealde govva maŋŋel álgočájálmasa, gos teátherhoavda Rolf Degerlund jugii lihkku sávaldagaid ja goikebierggu sidjiide geat eanet ja unnit leat seaguhuvvon čájálmassii, gurut rávddas olgeš guvlui, Rawdna Carita Eira (jorgalan oasážit), Rolf Degerlund, Asta Balto (jorgalan giehtačállosa sámegillii), Mary Sarre (neavttár), Harriet Nordlund (bagadalli) og Roger Ludvigsen (musihkka).
NRK Sápmi ráhkadii vuđđolaš ášši čájálmasa birra, dás leat maid videooasážat, geahčes fal.
Ironalaš suohttasat
Mary Sarre lea maiddái leamaš mielde čállime teáhterbihtá ja dadjá ná dan birra mii boahtá dáhpáhuvvot gaskavahku ovdal skilleduorastaga: “Bihttá galgá ironiijain ja suohttasiin čájehit makkár vuordámušat nissonolbmuin ja dievdoolbmuin leat alcces ja earáide. Ja dát eai leat mu iežan vásáhusat, guhkkin eret”, oaivvilda Sarre. Dan seamma deattuha Harriet Nordlund maid, guhte lea bihtá váldočálli ja bagadalli. “Čájálmas almmustahttá nissoniid čiegusvuođaid, nu go Dievdoolbmái áibbašeapmi ja movt sálvat daid hástalusaid mat šaddet eallimis, ja man birra ii hubmojuvvo”, lohká Nordlund. “Gába rahpá Áhku Power uvssaid”, lohka Nordlund guhto maid lea leamaš teáhterhoavdan Sámi Našunálateáhteris. Govas dá bagadalli Harriet Nordlund ovttas neavttárin Mary Sarre:in (govven Aslak Mikal Mienna).
Čájálmas
Lea sámegillii, bistá 45 min. Álgočájálmas: Guovdageaidnu 23.3.2016, LES-vistis. Čájálmasmátki ii leat vel plánejuvvon.