Teáhter vuolggaha teáhterjagi 2019 olles guvttiin áibbas ođđa čájálmasaiguin ođđajagemánus. “Juoiggas”, mas luođit ja musihkka lea guovddážis, čájehuvvo vuohččan 18. B. ja “Nissondeaivvadeapmi” maid Sven Henriksen lea čállán fas 25. B.

Juoiggas Ensemble

Sámi Našunálateáhter čájeha 2019is máŋgga ođđa čájálmasa ja dal jo ođđajagimánus čájeha teáhter 2 čájálmasa mat eai leat ovdal čájehuvvon. “Juoiggas!” lea vuosttaš, ja nu mot jo namma čilge, de lea luohti guovddážis dán čájálmasas, ovttas musihkain.  Nubbi lea “Nissondeaivvadeapmi”,  gos golbma nissonolbmot gevvet birgehallat sohkabealálaš, seahtoservodataláš ja eamiálbmot vealaheapmi hehtte- ja hástalusaiguin.

Juoigankonseartačájálmas “Juoiggas”

4 neavttára/juoigi ja 3 musihkkárat ovdanbuktet luđiid ovttas musihkain, ea. ea. luđiid mat jo don dolin leat juigon ja gullon. Earret luohti ja musihkka, de lea čájálmasa váldovuođđu Rašdna Carita Eira ja Harald Gaski čállosat, ja buot dát lea čatnon oktii teáhterhoavdda Rolf Degerlund bagadeami bokte.

Leat neavttárat Mary Sarre, Iŋgor Ántte Áilu Gaup, Nils Henrik Buljo ja Egil Keskitalo, geat leat lávddis, ja sii ovdanbuktet luđiid ja Eira-Gaski teavsttaid, ovttas musihkain maid musihkkárat Roger Ludvigsen, Svein Schultz ja Jakop Janssønn leat heivehallan ja maid de čuojahit. Juoigankonseartačájálmas čájehuvvon vuohččan Oslos, Riksscenenis, ođđajagimánu 18. B.. Maŋŋel Oslo čájehuvvo čájálmas Troanddimis ja davás Sápmái gitta guovvamánu 22. B. rádjai. Dá lea “Juoiggas”.

Nissondeaivvadeapmi

Anja Saiva Bongo Bjørnstad, Ánne Mággá Wigelius, Sarakka Gaup

Dá lea Nissondeaivvadeami vuolggasadji: “Dan áigásaš sohkabeali-, seahtoservvodaga- ja eamiálbmogiid vealaheapmi dagaha gáržžes ovdánanvejolašvuođa. Mot dát golbma nissona birgehallet, ja mot dat čuohcá sidjiide? Lea sámepolitihkalaš ja nissonpolitihkalaš teáhtermáinnas, mii lea čállojuvvon historjjálaš dieđuid – ja áigeguovdilis dáhpáhusaid vuođul”.

Čájálmasas, mas lea máilmmiálgočájálmas ođđajagimánu 25. B. Guovdageainnus, leat neavttárat Anja Bongo Bjørnstad, Sarakka Gaup ja Ánne Mággá Wigelius. Lea Sven Henriksen guhte lea čállán dán “deaivvadeami”, maid Mette Brantzeg bagada. Buot namuhuvvon olbmot leat ovdal leamaš barggus Sámi Našunálateáhteris, muhto dán čájálmasas leat guokte Beaivváš-debutántat, soai geat hábmeba biktasiid ja šuoŋa; Anne Berit Anti lea vuosttaš geardde bivttashábmejeaddjin teáhteris ja Elle Márjá Eira fas vuosttaš geardde šuokŋadahkkin teáhteris (govas dás vuolábeale, govven Aslak Mikal Mienna). Dá lea “Nissondeaivvadeapmi”.