Nubbi váldobuvttadus dán jagi, musikála “Guovssahasa hálddus", lea dal šaddagoahtime, dás leaba Nils Gaup ja Beaivváš debutánta Elin Oskal guovddažis.

Ensemble ja buvttadusajoavku Guovssahasa hálddus

De olliimet juo gaskamuddui min ávvojagi ja leat ollen sihke buvttadit, mátkkoštit čájálmasaiguin, ávvudit ja maid čađahit álgobargguid min nuppi váldobuvttadussii dán jagi, mii lea musikála “Guovssahasa hálddus.

Nils Gaup lea musikála čálli ja bagadalli (ja leat ge golihan juo 40 jagi dán rájes go son vuohččan bagadii teáhterčájálmasa; “Gánda ja golleloddi”). Sus lea fárus Knut Walle dramaturgan, gii bagadii teáhtera vuosttaš čájálmasa “Min duoddarat” 1981s.

Lassin leat mielde šuokŋadahkki Roger Ludvigsen, lávdehábmeajeaddji Ole Thomas Nilut, bivttashábmejeaddji Sara Ellen Anne B. Eira, čuovgahábmejeaddi Øystein Heitmann, filbmejeaddji Andreas Ausland ja neavttárat geat galget neaktit ja lávlut leat Iŋgor Ántte Áilu Gaup, Mary Sarre, Egil Keskitalo, Marte Fjellheim Sarre, Nils Henrik Buljo ja neavttárdebutánta Elin Oskal.

Sara Ellen Anne B. Eira lea ovttas Elin Oskalin maiddái debutánta Beaivvážis, son lea gal ovdal gorron čájálmasbiktasiid (Pelle Njoammil čájálmassii), muhto lea dál vuohččan bivttashábmejeaddji.

Musikálas lea álgočájálmas golggotmánu 8. beaivvi, Guovdageainnus. “Guovssahasa hálddus” šaddá dán áigásaš muitalus mas dološ muitalus “Bártnáš guhte hárddii guovssahasa” lea vuođđun, ja musikála galgá heivet sihke mánáide, nuoraide ja rávisolbmuide. Eanet dieđut dán buvttadusas lea gávdnamis dáppe.