Guovžža vuoššat čájálmas geavai loahpa loahpas olgočájálmassan ja dal lea ge čájehuvvon olgun álgočájálmasa rájes. Maŋemus čájálmas čájehuvvui Guovdageainnus guhkesbearjadaga.

Jacob Hultcrantz, Eila Ballovara Varsi, Anitta Suikkari, Nils Henrik Buljo, Iŋgor Ántte Áilu Gaup, Mary Sarre, Emil Karlsen, Egil Keskitalo, Marte Fjellheim Sarre, Paul Ottar Haga (ensemblet Guovžža vuoššat)

Sámi našunálateáhter ráhkkanišgođii diibmá Guovžža vuoššat čájálmasa, plána dalle lei ahte galggai ráhkaduvvot nu mot dábálaččat. Galggai čájehuvvot nu mot dábálaččat, čájálmasvisttiin ja na de johtit viidát sihke norgga-, suoma- ja ruoŧabeale, nu mot jo teáhter bargá dábálaččat. Muhto unnán lea leamaš dábálaš dal badjel jagi. Korona sivas lea olu rievdaduvvon, maŋiduvvon ja šluhttejuvvon, nu maid ge Guovžža vuoššat teáhterčájálmas. Ja dáid sivaid geažil geavaige Guovžža vuoššat čájálmas olgočájálmassan ja čájálmasmátki šattai oalle mihá unni ja measta báikkálaš.

Nils Henrik Buljo, Paul Ottar Haga (Guovžža vuoššat)

Buorre muhto oanehaš

Álgočájálmas, olgun, lei Guovdageainnu gilišiljus, njukčamánu 5. B. Oktiibuot lea čájehuvvon 13 geardde, eanas rabas čájálmassan, muhto maid skuvlačájálmassan. Lea maiddái čájehuvvon Álttás, Deanus ja Kárášjogas. Ja de čájehuvvui maŋemus geardde Guovdageainnus guhkesbearjadaga. Okta čájálmas šluhttejuvvui dálki sivas Buolbmágis, Deanus ja dálki maid maŋidii ovtta čájálmasa Guovdageainnus. Buot čájálmasat ledje dievvá, nuppi bealis, ii leat nu váttis deavdit čohkansajiid, go vuosttaš áigodaga eat beassan luoitit sisa eará go 100 geahčči ja maŋemus áigodaga (Kárášjoga rájes (26.3. rájes), dušše 50 geahčči oktanaga. Dieđusge korona sivas.

Čájálmas váldui bures vuostta sihke gehččiid ja media bealis.  

Guovžža vuoššat čájálmasa lea Leif Stinnerbom bagadan (Jimmy Meurling lea leamaš veahkki) ja vuolgá Mikael Niemi Koka björn girjjis. Goappašagat galggaiga dieđusge boahtit geahččit čájálmasa, muhto korona bissehii nu bargamis (leaba ruoŧas eret, orruba maid doppe). Dáppe leat eanet dieđut olgočájálmasa Guovžža vuoššat birra.

Jakob Hultcrantz, Eila Ballovara Varsi , Nils Henrik Buljo, Anitta Suikkari, Egil Keskitalo (Guovžža vuoššat)