Hedda-beivviid oktavuođas čájeha Beaivváš Guovžža vuoššat čájálmasa Oslos. Čájálmas mii ovdal dušše lea čájehuvvon olgun, dálvveáigge, lea dal heivehuvvon viesosis čájálmassan.
Hedda-beivviid oktavuođas čájeha Sámi Našunálateáhter Beaivváš Guovžža vuoššat čájálmasa Oslos guktii ja dát dahpahuvvo ovttasbargoteáhtera, mii dán čájálmasas maiddái lea ovttasbargobuvttadeaddjiteáhter, Det Norske Teatret (ođđa-dárogielat teáhter) guossis, bearjadaga geassemánu 17. B., guovtti čájálmasa bokte. Dá lea viesosis veršuvdna, mii ii leat ovdal čájehuvvon. Dá bajábealde buot neavttárat govvejuvvon Guovdageainnu gilišiljus mannan jagi, giđđadálvve.
Heddabeaivvit leat Norgga stuorimus teáhterriemut, gos “buot” teáhterat deaivvadit juohke jagi, dát lágiduvvo Oslos, ja dáid oktavuođas geigejuvvo Hedda-bálkkašupmi, maid juste Sámi našunálateáhter lea ožžon guktii (čájálmasaid Vølundda muitalus ja Vidas Extremas bokte). Dán jagi ii leat Beaivváš nammaduvvon oažžut dán bálkkašumi.
Olgočájálmasveršuvdna
Čájálmas čájehuvvui vuohččan goavvejagis 2021s, olgun dálvveáigge, álgočájálmas lei njukčamánus Guovdageainnus, ja das maŋŋel čájehuvvo olgoveršuvdna dušše dain lagamus suohkanin. Goavvejahki gáržžidii ja unnidii teáhtera vejolašvuođaid čájehit dán olu eanet báikkiin ja gehččiide. Dá vuolábealde, videobihtáš álgočájálmasas, dalle lei maid heargi mielde lávddis. Dát dáhpáhuvai dušše fal álgočájálmasas, ja ii ge šat maŋŋelaš. Filbmen Aslak Mikal Mienna.
Hárjehallamat viesosis-veršuvdnii dahpahuvvo dáid beivviid Guovdageainnus, de leat buot čájálmasa logi neavttára ja veahkkebagadalli ja teknihkalaš bealit deaivvadan bargat muhtin beaivvi. Dá govva govvejuvvon diimmáš hárjehallamiin mat álggus ledje siste ovdal go de fárrejedje olggos. Govven Aslak Mikal Mienna
Eanet dieđut čájálmasa birra, diimmáš veršuvnna birra ja dás dieđut viesosisveršuvnna birra.