Dal moadde beaivvi ovdal juovlaruohtaeahkeda, de besset maiddái teáhtera Dievddut, juovlaluomustállat, go dal lea komediija maŋemus čájálmas čájehuvvon. Maŋemus čájálmas lei Romssas juovlamánu 21. B.
Ja dal, moadde beaivvi juovlaruohtaeahkeda, besset Dievddut, dahje dát golbma dievdoneavttárat Dievddut komediijas, duođai álgit rahkánit juovllaide ja juovlalupmui. Duohtavuohta han lea ahte maŋemus čájálmas, dán čájálmasas mas lei vuosttaščájálmasa skábmamánu 25. B. Guovdageainnus, lea dal čájehuvvon, Rådstua Teáhtervistis Romssas. Doppe čájehuvvui guktii guovtti beaivvi badjel.
Vuosttaščájálmasa rájes lea čájálmas finadan máŋgga báikkis sámis, sihke norgga-, suoma- ja ruoŧabeale. Egil Keskitalo, Nils Henrik Buljo ja Iŋgor Ántte Áilu Gaup leat čuččodan lávddis ja čájehan čájálmasa 19 geardde, 12 iešguđege báikkiin. Muhto dal lávdi, almmolaš hivsset, oktan luŋkkáiguin, gožžarokkin, sáibbuin ja speadjalin, mii lea leamaš juovlakomediija fysihkalaš rámma, maid Jan Ericsson lea čállán ja maid teáhterhoavda Rolf Degerlund lea bagadallan, njeidon arvideamas agi beaivái, seammás go dal dieđusge lea čájehuvvon maŋemus geardde.
Geahččit lea lihkon bures čájálmasa, maiddái media, go bircolohku 5ž iđistii soapmásiin. Čájálmas buvttaduvvui jo giđđat, muhto go de lei gearggus čájehuvvot, de ráddjejuvvui gitta skábmamánnui, go de čájehuvvui vuohččan. Muhto dal geavai vuosttaš davvi-sámegielat ruoŧa klassihkar vuorkái.