Imaštalan čájálmas guovddáš olbmot deaivvadedje aitto hábmegoahtin dihte čájálmasa mii galgá vuosttaš geardde čájehuvvot čakčamánus. Čálli/bagadalli persovnnalaš vásáhus čižžeborasdávddas lea čájálmasa vuođđu, muitaluvvon Mary Sarre ja Roger Ludvigsen bokte musihkain ja neaktimiin.
Dal geassemánus deaivvadedje Imaštalan čájálmasa guovddáš olbmot hábmegoahtin dihte čájálmasa mii galgá leahkit gárvvis čájehuvvot vuosttaš geardde čakčamánu 2. B.. Sihke čálli, guhte maiddái lea čájálmasa bagadalli, Eva Dons, ja dieđusge neavttár Mary Sarre ja musihkkár Roger Ludvigsen leigga deaivvadeamis, nu maiddái čájálmasa bivttashábmejeaddji Ramona Salo Myrseth ja muđui earát teáhteris.
Čižžeborasdávda
Čájálmasa vuođđu lea čálli/bagadalli iežas persovnnalaš vásáhus čižžeborasdávddas ja buozalmasjođus. Dan galgaba neavttár Mary Sarre ja musihkar Roger Ludvigsen nu bures go vejolaš musihka ja neaktima bokte muitalit. Musihkka lea dehálaš reaidu čájálmasas.
Čájálmasa vuosttaščájálmas lea Guovdageainnus, das maŋŋel johtá čájálmas Finnmárkkus ja Troms bealde, ja finada maiddái golbma báikkiin suomabeale.
Dáppe leat eanet dieđut čájálmasa birra, ja maiddái gos čájálmas čájehuvvo.
