Jallas Stállu video

Sámi našunálateáhtera mánáidčájálmas Jallas stállu lea oaidnimis video bokte dás, sotnabeaivve miessemánu 31. b. dii. 12:00 rájes. Čájálmasa lea Iŋgor Ántte Áilu čálistan, ja lea ge maid ieš neavttár ja muitaleaddji čájálmasas.

Jon Niillas lea olgun buđaldeame, go de deaivvada njoammelčivggain mii gal ii bala Jon Niillasis, muhto baicca stoahkagoahtá suinna. Njoammelčivga ain njuikula go Jon Niillas lahkonaddá. Nie soai stoahkaba, ovdal go njoammelčivga jávkkeha. Lei juo sevnnjodišgoahtán ja Jon Niillas lea nu guhkas čuvvodan njoammelčivgga ahteson ii šat deaivva ruoktot. Son čuorvugoahtá eatni ja áhči, muhto eaba soai gula. Jon Niillas čierru, lea váiban ja čuorvu nu jitnosit go nagoda, ja de gal lea muhtin gii gullá su! Stállu!

• Čálli ja neavttár, muitaleaddji: Iŋgor Ántte Áilu Gaup
• Bagadalli: Rolf Degerlund
• Hábmen ja ráhkadan visuála govahallama: Bernt Morten Bongo

Čájálmas bistá sullii 27 min. Lea davvisámegillii, tekstejuvvon dárogillii.