Sámi Mánáid Teáhter fitná Sámi Našunálateáhtera guossis Sámi Álbmotbeaivvi ja čájeha iežas “Liiko munnje” čájálmasa. Čájálmas čájehuvvo Guovdageainnu kulturviesus guovvamánu 6. B. dii. 18:00 ja lea nuvttá buohkaide.

Govven/foto: Ine Beate Eriksen
Ayla Iselin Hætta isaksen

Deanu kulturskuvlla Sámi Mánáid Teáhter finada Sámi Našunálateáhtera guossis Sámi Álbmotbeaivvi ja čájeha iežas “Liiko munnje” čájálmasa. “Liiko munnje” bihtá lea nu áigeguovdil go fal oba sáhttá ge šaddat, ea. ea. nu muitaluvvoge bihtá birra dás.

Čájálmas čájehuvvo Guovdageainnu kulturviesus Sámi Álbmotbeaivvi guovvamánu 6. B. dii. 18:00 ja lea nuvttá buohkaide.

Logi jagi dassái

Lea 10 jagi áigi go maŋemus ledje Guovdageainnus, muhto dál lea viimmat Sámi Mánáid Teáhter fas boahtime Guovdageidnui, ja juste vel Sámi Álbmotbeaivvi! Guovvamánu 6. beaivvi čájehit sii sin ođđaseamos čájálmasas “Liiko munnje” Guovdageainnu kulturviesus.

“Mii dáhpáhuvvá minguin ja min jurdagiin jos ealli čalmmit eai oainne min? Jos ii leat ealli olmmoš geasa oažžu guoskat, gean sáhttá haksit. Jos ii oktage oainne du? Ii oktage gula du? Jos eanas olmmošlaš  gaskavuođat dáhpáhuvvá šearpma bokte?”

 “Liiko munnje” čájálmas lea dan birra movt sosiála mediijat váikkuhit ja bahkkejit nuoraid eallimii. Ja dáinna čájálmasain lea Sámi Mánáid Teáhter ráhkadan veaháš earálágan čájálmasa go ovdal leat dahkan, lea čájálmas mas buot karakterat ellet interneahtas, eaige oba ge duohta eallimis. Ráhkadettiin bihttá fertejedje mannat abstrákta lihkadanmáilbmái, ja dasa ožžo sii buori veahki koreográfas Marte Fjellheim Sarres. ” – Teakstačálli Mari Hesjedal lea min mielas čállán nu buori giehtačállosa. Dat lea nu áigeguovdil go fal sáhttá! Teaksta giktala miellagovaid”, lohka Deanu kulturskuvlla rektor ja bihtá bagadalli, Ebba Joks.

Sámi Našunála Teáhter Beaivváš illuda fállat gehččiide Sámi Mánáid Teáhtera čájálmasa, geat muđui ge barget dehálaš barggu ráhkadit buriid čájálmasaid mánáide ja nuoraide maiguin maid lea buorre ja dehálaš sisdoallu. Sámi teáhterlávdi dárbbaša Sámi Mánáid Teáhtera.

«Liiko munnje” lea čájálmas mánáin ja nuorain ráhkaduvvon mánáide ja nuoraide. Fuom! Rávisolbmuide lea dieđusge maid buresboahtin čájálmassii. Čájálmas heive sihke mánáide, nuoraide ja rávisolbmuide.

Dás dieđut čájálmasa birra.

Govven/foto: Ine Beate Eriksen
Sámi Mánáid Teáhter, Deanu kulturskuvla