Golggotmánu 5. B. čájehii Sámi Našunálateáhter iežas Pippi-veršuvnna vuosttaš geardde. Dan rájes lea čájálmas čájehuvvon viidát ja govdadit Sámis. Ja skábmamánu 5. B. čájehuvvui maŋemus čájálmas, nu maiddái Guovdageainnus, gos teáhter doallá viesu. Ja nu mot jo buot čájálmasat mátkkis, de maŋemus čájálmas gesii maid olu olbmui, go čájálmas lei meastá dievvá.
Marte Fjellheim Sarre (Pippi) lea ovttas ea. ea. Sarakka Gaupain (Tommi) ja Anja Saiva Bongo Bjørnstad (Annika), dá bajábealgovas lávderavddas, leat ovttas ensemblen leamaš mearehis bivnnuhat. Buot čájálmasaiguin olles čájálmasmátkkis leat leamaš olu olbmot. Muhto de dal gaikkoduvvo Villa Villakulla maŋemus geardde, ja dán bokte lea de Pippi čájálmasráidu nohkan, na goit dán háve.