Terje Joks Henriksen, Áilloš, Ivvár Niillas (Nils I. Porsanger), Bojen Ánte (Anders M. Skum). Foto/govven Aslak Mikal Mienna

Áilloš, Ivvár Niillas, Terje Joks Henriksen ja Bojen Ánte muitalusaiguin ja luđiiguin.

Beaivváža neavttár Iŋgor Ántte Áilu Gaup, dahje Áilloš, lea erenoamáš giitevaš go dál lea ožžon eallilan olbmuid mielde Beaivváš Sámi Našunálateáhterii. Deatnulaččain ja 88 jahkásaččain Ivvár Niillasiin (Nils Iversen Porsanger), guovdageaidnulaččain ja 73 jahkásaččain Bojen Ánttiin (Anders M. Skum) dolle dal Áilloš ovttas nuppi “nuorra” olbmáin, kárášjohkalaččain Terje Henriksen Joks, smávit mátkái Sámis, guoimmuhit luđiiguin ja fearaniiguin.

Nu mot Áilloš dadjá, luđiid ja fearaniid lea beassan gullat mánnávuođa rájes iešguđege sajiin. Lunttažiin son gulai olbmuid juoiggastallame, de dávjá lei heajastallamiin dahje ledje oaivvahuvván ja vázze viesuid mielde. Ii čielggusolbmuid bálljo goasse beassan gullat juoigame. Muhto áiggit rivdet ja juoigama olis orru dál manname buoret guvlui go dál lea skuvlaoahpahusas luohti oahppofáddán. Ja ruovttuin maid leat duostagoahtán rohttet luođi balatkeahttá earáid navdit du leat gárremin dahje hoavrristeame.

Dainna čájálmasain dahje luohte ja fearan bottuin, mii bistá sullii diimmu, johtá kvarteahta guovddáš sámi báikkiide Finnmárkkus. Lea vuosttažettiin jurdda finadit báikkiin gos vuorrasat čoahkkanit dahje orrot, muhto spiehkasteapmi das maid lea.

Čájehuvvui vuosttašgeardde Mázes, 1.12.2010. Dán diehtočállosis eanet dieđut muitaleddjiid ja juigiid birra, ja muitala maid gos čájehuvvoi dalle.

Govat govvejuvvon “bottožis”

Govvejeaddji Aslak Mikal Mienna, krediteren gáibiduvvo geavaheamis.