Guovssahasa hálddus bearaščájálmasa vuolggasadji lea dološ sámi muitalusas ja lea dál fargga oaidnimis ja gullamis, ođđa hámis. Bagadalli ja čálli Nils Gaup doallá dán dehálažžan ahte dološ máidnasat an muitaluvvojit, nu mot sámi našunálateáhter bargá dal dán bokte.

Nils Gaup, Egil Keskitalo, (Elin Oskal, Mary Sarre), geahččaleamis/opprøving, Guovsshasa hálddus

Musikála “Guovssahasa hálddus” muitalus dáhpáhuvvá otná áiggis muhto vuođus lea sámi máinnas bártnáža birra guhte hárddii guovssahasa. Musikála čálli ja bagadalli lea Nils Gaup gii lohka bures muitit dien muitalusa man son mánnán juo gulai. – Álo go oainnán guovssahasa de muittán dán muitalusa. Ja mu mielas lea hui dehálaš ja mávssolaš ahte dán áigásaš mánát ja nuorat maid oahpásnuvaše min dološ sámi máidnasiidda, lohka son.

Mannan geasi devddii Sámi Našunálateáhter Beaivváš 40 jagi, ja lea ge maid 40 jagi áigi go Nils Gaup vuohččan lei bagadallin teáhteris, “Gánda ja golleloddi” čájálmasas, ja son lei maid koreográfa Beaivváža vuosttaš čájálmasas; “Min duoddarat” mas Knut Walle lei bagadalli (son lei ge maid Beaivváža vuosttaš dáiddalaš jođiheaddji). Dál lea son mielde dramaturgan.

«Guovssahasa hálddus” musikálas deaivvadit earret eará čahkkalaggáiguin, gieddegašgálgguin ja jiehtanasain. Muhto sin ii soaitte leat lihkka álki dovdat go ovdalaš áigge lei? Šaddá goit action, šaddá somá, ja diehttelasat beassat maid gullat ollu ođđa lávlagiid. Teáhter lea ge hui duhtavaš go lea ožžon mielde nuorra sámi artista Elin Oskal (guhte maid lea dán jagi sámi BlimE! artista). Earret Oskal, de dán bearášmusikálas lávlot ja nektet Marte Fjellheim Sarre, Mary Sarre, Nils Henrik Buljo, Iŋgor Ántte Áilu Gaup ja Egil Keskitalo.

Guovssahasa hálddus lea álgočájálmas golggotmánu 8. b., johtá davvisámis. Dás eanet dieđut čájálmasa birra. Dá govat hárjehallamiin (ja muđui ge).