Bearjadaga golggotmánu 9. B. lei vuosttaš geardde go Skoavdnji čájálmas čájehuvvui, čájálmas lei dievvá ja geahččit válde čájálmasa hui bures vuosttá. Seammás lei dát teáhterhoavdda Haukur J. Gunnarssona maŋemus čájálmasbagadeapmi Beaivvážis teáhterhoavdan.
Bearjadaga golggotmánu 9.b. čájehuvvui Skoavdnji čájálmas 2015 veršuvdna, vuosttaš geardde almmolaččat go lei vuosttaščájálmaseahket Guovdageainnu kulturviesus. Olbmot ledje hui mielas dasa maid besse oaidnit ja gullat, dan fal dát video mii das vuolábealde oidno, duođašta.
Seammás go čájehuvvui vuohččan, de lei dát dalá teáhterhoavdda Haukur J. Gunnarssona maŋemus čájálmasbagadeapmi Beaivvážis obanassiige, teáhterhoavdan. Son loahpa virggistis dan jagi, de lea ge leamaš Beaivváš hoavdan oktiibuot 15 jagi. Lávddis giiti Beaivváža stivrrajođiheaddji Lene Hansen, Haukura, ii dušše Skoavdnji čájálmasa ovddas, muhto maid buot maid son lea bargan ja mearkkašan ii dušše Beaivvážii, muhto olles Sámi servodahkii. Geahča video das vuolábealde buot mii daddjui stivrrajođiheaddji bealis dien bearjadaga. Govas dá olgešbealde lea stivrrajođiheaddji lávddis ovttas bivttas- ja lávdehábmejeddjiin Bård Lie Thorbjørnsen, teáhterhoavddain, čuovgahábmejeddjiin Øystein Heitmann ja de šuokŋadahkkiin Frode Fjellheimain (ii leat eará go dárogillii) (govven Aslak Mikal Mienna).
Haukur J. Gunnarsson lea doaibman teáhterhoavdan guovtti, guhkiduvvon áigodaga, vuos álggus 1991-1997 ja de nuppi áigodat, mii lea bistán 9 jagi, 2007-2015. Juovlamánu loahpageahčen lea son oktiibuot doaibman hoavdan 15 jagi, Beaivváža 35 jagi doaimmas. Skoavdnji čájálmas čájehuvvui vuosttaš geardde 1994is, dalle maid Beaivvážis ja dal de nuppes, 21 jagi maŋŋel. Bagadalli dalle lei nu mot dal, Haukur J. Gunnarsson. Haukur lea 1991 rájes bagadan sullii 20 čájálmasa (unnit ja stuorit), ea. ea. čájálmasaid nu mot “Narukami “ (1991),”Skoavdnji” (1994 ja 2015), “Lájlá” (2002), “Allaq” (2010), “Ridnoaivi ja nieguid oaidni” (2007 ja 2013). Ovdalaš dán jagi bagadii maid mánáidčájálmasa “Njuoru Niilá”.
