Sámi Našunálateáhter Beaivváš lea vuosttaš sámi lávdi gos Pippi Nallesuohkku čájehuvvo, ja Marte Fjellheim Sarre galgá neaktit máilmmi gievrramus nieiddaža. Son illuda neaktit vuosttaš sámegielat Pippi dán máilmmis, muhto son maid illuda go dákkár mávssolaš muitalus maid Pippi ovddasta dál galgá čájehuvvot sámi mánáide ja nuoraide.

Marte Fjellheim Sarre

Dan rájes go Pippi girji almmuhuvvui 1940 loguin lea son ihttán oidnosii vaikko makkár hámis ja gielain miehtá máilmmi. Dattetge ii leat čájehuvvon goassege sámi lávddis ovdal go Sámi Našunálateáhteris dál áigut čájehit Pippi Nallesuohku dán čavčča. 28 jahkásaš Marte Fjellheim Sarre galgá neaktit Pippi. Su mielas lei stuorra gudnin oaččut dán rolla go sus lea álo leamaš nana lagasvuohta Pippii ja go viimmat sámi mánát ja nuorat besset oaidnit Pippi sámegillii, lohká Marte.

Dehálaš ahte Pippi čájehuvvo sámi mánáide

Marte lea Kárášjohkalaš, muhto orru dál Oslos. Bajásšattadettiin Kárášjogas oahpásnuvvái Pippii go logai girjjiid ja oinnii Pippi filmmaid ja gudnejahtti dan vuoiggalaš ja jálos nieiddaža. Danne go Pippi bidjá jearaldatmearkka min norpmaide ja njuolggadusaide, ja lea čeahppi ákkastallat manne diet eai máhkaš guoskka buohkaide. Dasa lassin vel go Pippi lea nieidaolmmoš, ja sus lea mihtilmas iešláhki,  maid servodagas muhtomin čatnet olmmáivuhtii. Aŋkke son dainna ii divtte gáržudit iežas leahkit earálágánin ja ovdagovván eará nieiddaide lohka Marte. Son lea hui duhtavaš Pippi ovddastemiin maid sámi mánát dál besset oaidnit sámegillii.

Marte Fjellheim Sarre/Njuorju Niilá
Marte Fjellheim Sarre som Njuorju Niilá

Soaitá baicca Hr Nilsson

Marte Fjellheim Sarre lea oahppan dánsejeaddji, son lea gaccan dánsenoahpu Stavanger universitehtas ja Hollánddas. Dan maŋŋel barggai dánsapedagogan ja dánsejeaddjin, muhto sus lea maiddái neavttárhárjáneapmi, earenoamážit elliid neaktit: Sámi Našunálateáhteris nevttii Niilá njuorjjočivgga, mii lei váldorolla Njuorju Niilá čájálmasas. Son lei maid buoidda Tjeskie Åarjelhsamien teatere  “Bluppe” bihtás. Dieid elliid vásáhusa olis livččii várra lunddolaš ahte son neavttášii Hr Nilssona, Pippi Nallesuohku bihtás. Mun sáhtán geavahit iežan dánsejeaddji duogáža dán rollas go Pippi lea gievrras doaimmalaš nieiddaš, ja dan lean mun ge, lohka Fjellheim Sarre, go sáhttá dánsuma ja lihkastagaid geavahit das.

Váldá rolla Pippi-vuoiŋŋas

Ruoŧŧilaš girječálli Astrid Lindgren lea čállán Pippi máidnasa, ja Marte mielas lea dehálaš ahte mánát ja rávis olbmot dovdájit dan Pippi geainna leat oahpásnuvvan girjjiin ja filmmain, ja mu mielas lea hástalussan neaktit su, muhto cealkkán nu go son ieš livččii lohkan: Dán gal in leat goasse ovdal bargan, muhto gal mun birgen aŋkke!

Pippi vuosttaščájálmas

Vuosttaščájálmas lea golggotmánu 5. Beaivvi. Bagadalli lea Elle Sofe Sara (ovdal Henriksen), eará neavttárat leat earret eará Egil Keskitalo, Nils Henrik Buljo ja Sarakka Gaup. Saltkråkanis leat visot  vuoigatvuođat ja eaiggáda Astrid Lindgrena girječállosiid. Buot govat dán áššis lea Aslak Mikal Mienna govven. Eanet dieđut leat gávdnamis dáppe.

Pippi ensemble ja duogaš olbmot