Jáhkehahtti ja dehálaš

Ellos eatnu – Nullpunkt čájálmas orru deaivame árvvoštalliid. Ja gehččiid, maiddái dakkáraččaid geat dalle 40-jagi dassái vuosttildedje garrasit Guovdageinnu-Álttájoga dulvadeami, mii lea dán doku-drámálaš čájálmasa vuolggasadji. Álgočájálmas Romssas lihkustuvai hui bures.

Ellos eatnu – Nullpunkt lea doku-drámálaš čájálmas mii dáiddalaččat muitala maid dat deháleamos ja eanemus váikkuheaddji dáhpáhus Sámis ođđa áiggis barggai ja attii, namalassii Guovdageainnu-Álttájoga buođđudeami. Dal lea dát čájehuvvon vuosttaš geardde, ja dát dáhpáhuvai Romssas Hålogaland teáhtera stuorimus čájálmaslanjas mas buot sullii 300 saji ledje váldon, guovvamánu 8. b.. Árvvoštallit rámidit ja olbmot geat dalle vuosttildedje buođđudeami garrasit, njuorrasedje. Nu mot Niillas A. Somby, gii lei ruovttubáikkis Deanus boahtán geahččat álgočájálmasa dien disdat eahkeda. NRK Sápmái muitalii iežas njuorrasan čájálmasgeahčadettiin. Viidáset, son lei hirpmahuvvan mot teáhter na bures lea nagodan dáiddalaččat ovdanbuktit das mas son lei hui guovddážis dalle 40 jagi dássái ja ahte čájálmas govvida bures dieid dáhpáhusaid (dá bajábeale, neavttárat govas, ja duogabealde miellačájeheaddji Niillas A. Somby projektorgovas, váldon sullii 40 jagi dassái).

NRK árvvoštalli lihkui maid bures maid oinnii, ja čállá ahte “Teáhterbihttá Álttá-akšuvnnaid birra lea šaddan liggosis ja millii čuohcci dramatiseren dain dáhpáhusain mat bokte vuoimmi álgoálbmogiid vuoigatvuođaid bealušteapmái.” Muđui eará árvvoštallit rámidit čájálmasa, deattuhit erenoamážiid čájálmasa historjjálaš dehálaš- ja nanuvuođa.

Čájálmas čájehuvvo dás ovddasguvlui davvin, sihke norgga-, suoma- ja ruoŧabeale, ja de maid Oslos ja Troanddimis. Johtá gitta beassážiidda, čájehuvvo sihke rabas- ja skuvlačájálmassan.

Dás vuolábeale oainnát gos ja goas čájehuvvo. Dás fas leat eanes dieđut čájálmasa birra.