Aitto bálkkáhuvvon lávdehábmejeaddji ja Disney-suksessa šuokŋadahkki leaba guovddážis Beaivváš čájálmasas mas fargga lea vuosttáščájálmas.
Maŋemus geasi šattai Bård Lie Thorbjørnsen Hedda-bálkkašumi vuoiti buoremus lávdehábmema ovddas čájálmasas “Når vi døde våkner”, Trøndelag Teateris. Ja dal čakčat lea son Beaivvážis, lávdehábmejeaddjin “Skoavdnji” čájálmasas. Ja buvttadussii lea maid vižžon eará gii maid lea duođaštuvvomis dahkan hui nanu barggu iežas suorggis, nammalassii Disney-susksessa šuokŋadahkki Frode Fjellheim. Fjellheim dagai lávlaga/luođi mii šattai animašuvdnafilmma Frost/Frozen (/Bihci) álgošuokŋa, filbma mainna Disney lea mearehisladje lihkostuvvon. Fjellheim lea maid bálkášuvvon ovdalaš, ea. ea. lea sutnje geigejuvvon Norgga deháleamos musihkkabálkkašupmi, Spellemannsprisen. Hedda-bálkkašupmi lea fas Norgga deháleamos teáhterbálkkašupmi.
Lie Thorbjørnsen gal lea oktii ovdal leamaš iežas čehppodagain Beaivvážis, čájálmasas “Guohcanuori šuvva”, 2011, muhto Fjellheim gal ii leat, son lea vuohččan Beaivvážis. Øystein Heitmann lea máŋgii leamaš Beaivvážis, ea. ea. čájálmasas “Nikio” 2008, “Allaq” 2010 ja “Min duoddarat III” 2011. Haukur J. Gunnarsson lea fas bagadan máŋga čájálmasa, ea. ea. bagadii son mánáčájálmasa “Njuorju Niiilá”, mii čájehuvvui ja mátkkoštii dá dálvegiđa ovdalaš dán jagi. Gunnarsson lea nu mot diehtit heaitime teáhterhoavdan Beaivvážis, dát čájálmas šaddá su maŋemuš čájálmas Beaivvážis obanassiige teáhterhoavddadeddiin.
Čájálmasa neavttárat leat Egil Keskitalo, Ida Løken Valkeapää, Heli Huovinen, Nils Henrik Buljo, Ingá Márjá Sarre ja Áilloš.
Vuosttáščájálmas lea Guovdageainnus golggotmánu 9. B. , maŋŋel dán johttá čájálmas viidát.