Sámi našunálateáhter čájeha golbma čájálmasa beassážiin Guovdageainnus, leat guokte nanu guossečájálmasa ja de vuolggaha teáhter maid beassážiid guhkit čájálmasráiddu Sámis ovttas máilmmi gievrramus nieiddažin.

Sámi našunálateáhter váldáge maid dán jagi oasi Guovdageainnu beassášmárkaniin, ja fállá olles golbma čájálmasa. Leat guokte nanu guossečájálmasa ja de vuolggaha teáhter dan mii lea dán giđa stuora teáhterčájálmas Sámis, namalassii Pippi Nallesuohkku.

Gii gotti mu áhči?

Sámi našunálateáhtera ovttasbargo teáhteris Oslos, Det Norske Teatret, sidjiide lea jo šaddan vierrun finadit guossis beassážiid. Dán jagi boahtá Det Norske Teatret rámiduvvon čájálmasain Gii gotti mu áhči?, čájálmasas mas lea dát vuolggasadji: “Sidjiide guđiin lea buot, ii rievdat politihkka meastta maidege. Earáide lea sáhka eallima ja jápmima birra”. Dát čájálmas čájehuvvo sotnabeaivve 1. Beassášbeaivvi, 12.4. Guovdageainnu kulturviesus. Dás oainnát eanet dieđuid čájálmasa birra. Diibmá finai Oslo teáhter Abrahama mánát čájálmasain, 2018 finai Ane Dahl Torp teáhtera guossis Haugtussa čájálmasain.

Angerlarsimaffeqanngitsoq – The Homeless

Eallimis ii lihkustuva ja ovttat ládje šaddat oaffariin alcces ja iežas dilálašvuođain, muhto aŋkke nagodit eallit eallima nu mot lea oaivvilduvvon. Na de máidnu Elisabeth Heilmann Blind iežas dánsunčájálmasas Angerlarsimaffeqanngitsoq, The Homeless. Ja dát lea oaidnimis maid kulturviesus, guhkesbearjadaga 10.4.. Dás eanet dieđut čájálmasa birra.

Oastte bileahta beassáščájálmasaide – fuom: Pippi čájálmassii máksá bileahtta 50 ru eanet rávisolbmuide go uvssas oastá, neahtas lea hálbbit!

75 jagi ja an seamma geasuheaddji

Pippi čájehuvvui vuohččan Sámi teáhterlávddis dás beannot jagi dassái, lei bivnnut ja ollugat oalle mihá miehtá Sámi besse geahččat go máilmmi gievrramus nieiddaža sámástii. Ja go jo lei nu geasuheaddji ja go dasa lassin Pippi dán jagi deavdá 75 jagi (75 jagi dan rájes go vuosttaš Pippi girji almmuhuvvui), de Sámi našunálateáhter lea oktii vel válljen fállat Pippi, Annika, Tommi, Skilla ja Skálla, jna, gehččiide. Ja ii de fal dušše ođđa vuosttaščájálmasa bokte mii lea Guovdageainnus beassážiid, muhto nu mot ovddit háve, čájálmasmátki bokte viidát Sámis. Pippi čájehuvvo Guovdageainnus guktii beassážiid, gaskavahku ovdal skilleduorastaga, 8.4. ja vel skilleduorastaga 9.4. Maŋŋel beassážiid mátkkoštišgoahtá mánu cuoŋo- ja miessemánus.

Marte Fjellheim Sarre, (ja Skilla ja Skálla)