Go Sámi Našunálateáhter Beaivváš dal hui fargga čájeha vuosttaš álgočájálmasa dan jagi de leat guhtta nuorra neavttárat lávddis, dasa lassin leaba guovttis dáin debutereme teáhteris. Lea Kathrine Nedrejord romána Máid Sárá čiegada mii dal šaddá lávdedáiddan, dehálaš ja duođalaš fáttáin, muitaluvvo gelddolaččat.
Iežas goalmmát nuoraidrománas čállá Kathrine Nedrejord dáhpáhusaid smávva birrásis gos seksuálalaš veagalváldin dagaha buot gaskavuođaid geahččalusaid sisa. Su romana govvida balu, suhtu ja vártnuhisvuođa maid ollu nuorra nieiddat vásihit. Dal bearjadaga guovvamánu 24. B. Čájehuvvo čájálmas vuosttaš geardde, dát dahpahuvvo Guovdageainnus, ja das maŋŋel mátkkoštišgoahtá čájálmas.
Ja sii geat dán romána dal muitalit lávddehámis leat guhtta nuorra/nuorat neavttárat ja dasa lassin leat guovttis dáin vuosttaš geardde lávddis. Leaba Guovdageaidnulaš Gard Emil (nevttii Ellos eatnu filmmas) ja Romsalaš Henrik Spantell Valdermo geat lávkeba teáhterlávdái vuohččan, ja ovttas neavttáriiguin Marte Fjellheim Sarre, Eila Ballovara Varsi, Anja Bongo Bjørnstad ja Kristian Tapion, máidnot sii Nedrejorda romána gelddolaččat, ja binnáš eahpedábálaččat. Geahččit besset áibbas lávderávdi, goappáge bealde lávddi, dego “catwalkas».
Čájálmasa bagadalli lea Kristin Bjørn, gii beaivvalaččat lea Ferske Scener jođiheaddji, Romssas. Bihttá bivttashábmejeaddji Galina Urusova Valio lea maid debutánta Beaivvážis.
Čájálmasmátki lea davvin, sihke norgga, ruoŧa ja suoma bealde, ja finada maiddái Oslos. Dasa lassin čájehuvvo čájálmas skuvlačájálmassan, logi geardde, ovttasbarggus Kultuvrralaš skuvlalávkkiin.
Máid Sárá čiegada, oanehaččat: Muhtin feasta maŋŋel rievdá visot. Lajla áicá dakkaviđe ahte Sara rievdá, go álgá ballat seavdnjadasas, ja iežas suoivvanis. Vaikko Lajla lohpida ahte ii áiggo seaguhit iežas dasa, de áŋke ii máša. Son ferte diehtit gii lea sivalažžan, ja ahte son ii galggaše beassat eret vearredagus.
Eanet dieđut, čájálmasmátki ja govat čájálmasa birra leat dáppe gávdnamis.