Dal leat viimmat olleme mollii, na, goit fal measta. Dal ii leat go soames beaivvi ovdalgo Báru juogadeapmi čájálmas čájehuvvo vuosttaš geardde, vuosálggus Guovdageainnus. Bearjadaga čakčamánu 18. b. lea álgočájálmas, muhto dát čájálmas lea jo dievva. Muhto de 20. b čájehuvvo čájálmas oktii vel Guovdageainnus, de besset Guovdageaidnulaččat ođđasit fas navddašit teáhtera.

Das maŋŋelaš vuolgá ge teáhter mátkkoštit. Gaskkavahkku 23. b. lea čájálmas Varjjagis, duorastaga 24. b. fas Deanus ja das maŋŋel guođđá teáhter norggabeal sámi ja finada suomabeal sámis. Ja de fas 27. b. lea teáhter fas Norggabeal sámis, namalassi Kárášjogas. Eanet dieđut gos ja goas čájálmas jođaša, geahča dan siiddu.

Govat vuolábealde čájehit binnáš maid geahččit besset vásihit, duoppe ja dáppe – čájálmas lea čáppat ja visuála, ollu čáppa musihkka ja dieđusge, buorre neaktin. Bures boahtin.

Lásse (Ol Johan Gaup) ja Leelah (Ingá Márjá Sarre) vuojahagas.

Iŋgor Ántte Áilu Gaup

Filbma ja animášuvdna geavahuvvo čájálmasas. Video veahkeha Leelah vuodjamis.