Bearjadaga geassemánu 22. B. 2018 dáidá leamen okta dain stuorimus ja deháleamos beivviin teáhtera historjjas go de almmuhii ráđđehus mearrádusa cegget ođđa visti teáhterii. Lea oktasašvisti Sámi joatkka- ja boazodoalloskuvllain. Stivrrajođiheaddji ja teátherhoavdá illudeaba ovttas olles sámi teáhterbirrasin.
– Odne lean nu ilus ja giitevaš! Dán mearrádusa leat vuordán nu guhka. Dá lea sámiid oktasašvuoitu, mii manná maŋás guvlui Álttá Guovdageainnu eanu dulvadan ášši rájes, ja sámi ealáskahttima bokte gitta otnážii. Ollugiin lea oassi dán vuoittus, dadjá stivrajođiheaddji Lene Hansen preassadieđáhusastis.
Ráđđehus almmuhii ášši
Na de almmuhuvvuige dát ođas bearjadaga 22. B., Sámi visttistis, Oslo, gos sihke diehto- ja integrerenministtar Jan Tore Sanner, kulturministtar Trine Skei Grande ja gielda- ja ođasmahttinministtar Monica Mæland, serve. Geahča video gos de almmuhit, ákkastallet ja čilgejit mearrádusa (filbmejeaddji stivrrajođiheaddji Hansen, video lea Facebookas). Govas de leat ge dá ministarat, ovttas stivrrajođiheaddjin Lene Hansenin, ja Henrik Olsen ja Mikkel Eskil Mikkelsen, goappašat leaba Sámediggeráđis. Geahča Ráđđehusa siidduin ášši birra. Ja na muitalii NRK Sápmi ášši birra.
Visti nanne ja gievrudahttá
-Ođđa visti mearkkaša hui ollu sámegillii, identitehtii ja diehttelasat lávdedáidagii. Hui váttis bargodilálašvuođas leat min dáiddárat šaddan buvttihit earenoamáš dáidaga miehtá riikii. Mii leat vuoitán máŋggaid bálkkašumiid, dál galgat faŋuhit vel guhkkelii, dadjá Lene Hansen, ja lasihastá ahte “sus lea stuora doaivva ovttastit teáhtera ja skuvlla seamma vistái”.
Maiddái teáhterhoavda Rolf Degerlund illuda stuorrát, ja sávvá lihkku olles Sápmái go oaivvilda dát lea vuoitun olles Sápmái. Sihke son ja stivrrajođiheaddji giitiba maid buohkat sin geat máŋggaid jagiid leat bargan ollašuhttit dán, bargit, ovddeš stivrrajođiheaddjit ja teáhterhoavddat, bargu mii lea bistán oba mihá guhka.
37 jagi beaivvi alde (measta)
Beaivváš álggahuvvui geassemánu 21. B. 1981. Dán rájes lea teáhter doallán viesu Guovdageainnu kulturviesustis maid Guovdageainnu suohkan eaiggáda. Dal, geassemánu 22. B. 2018, measta beaivvi alde go teáhter deavdá 37 jagi (37 jagi ja ovtta beaivvi) lea mearriduvvon teáhterii visti.