Go Siri Broch Johansen nuorran vuoddjái biillain iežas ustibiiguin ruovttubáikkis Deanus Osloi, vudje boastut guvlui Heahtás, Eanodagas.

Siri Broch Johansen

Boasttuvuodjin attii teáhterčájálmasa

Go Siri Broch Johansen nuorran vuoddjái biillain iežas ustibiiguin ruovttubáikkis Deanus Osloi, vudje boastut guvlui Heahtás, Eanodagas. Luoddaearus suoma sámi gilážis 80 km lulábealde Guovdageainnu, dolleje gurut guvlui, daid sevdnjes suomabeale vuvdiid čađa. Mii daid sevdnjes vuvddiid siste dahpahuvai gal ii hálit muitalit, aŋkke bođii das teáhterbihttá mii soaitá muitalit mii dahpahuvai,  go golggotmánu 3. B. lea das álgočájálmasa su teáhterbihtás “Gurut guvlui Heahtás”, Beaivváš Sámi Našunálateáhtera lávddis (govas Siri Broch Johansen, govven Bent Johansen – deaddil gova jus dárbbašat stuoribut gova).

“Roadteáhter”

“Jua, mii vujiimet boastut. Dat lei mihá ovdal google map áiggiid, jus nu galgá dadjat, don dolin sáhti láhppot luotta ala. Doppe de leimmet, buiga meahcis, ii mihkkege luoddakárttaid, ja oalát jorbbodan”, muitala Broch Johansen. Vásáhusa lei ge aŋkke nu mearkkašahtti ja bidjá ge de vuođu su vuosttas eahket – miehtá teáhterbihttá,  mas sisdoallu lea biilamátkkošteapmi dobbelis ja nuortalis Heahtá. Juogalágaš roadmovie teáhterčájálmas, mas 4 nuorra olbmo leat mielde. Bihtá, dahje “roadteáhtera” sisdoallu, muitala Siri «lea movt olmmoš vállje soaittáhagas eará geainnu go dat mii lea vurdojuvvon sus. Soaitá gávdnat juoidá doppe gosa ii álggos galgan, soaitá leahkit juoga mihá buoret, go dat mii álggos lei jurddašuvvon».

Gurut guvlui Heahtás

Na de muitaluvvo: Anne ja Piera olbmáidisguin vuoddjájit Deanus Osloi. Lea njalkkas siivu, ja Heahtás dollejit nuorat boasttu guvlui gos buiga meahcis vudjet badjel luotta. Buorre lihkus besset vuoras bára guovtto Elle-Siina ja Jorma vissui liekkadit iežaset, dan botta go veahki vurdet. Dammanaga rievddiha sin eallin ja vajálduvvon šiggojuvvon dáhpáhusat ilbmet fas oidnosii. Čáffas ja somás teáhterbihttá mii guoskkaha sámi, dáru ja suoma gaskavuođaid ođđa ja imaštahtti ládje (govva dá olgešbealde illustrašuvdna govva, govven Aslak Mikal Mienna).

Ámmát gieđaid gaskkas

Siri lea ovdalaččas čállán 3 teáhterbihtá, muhto ii fal guhkebuš bihtáid. Ieš lea maiddái neaktán iežas čállon bihtáin ja son lea bagadallan, ja bargan eará teáhteriin. Ja dál lea čállán bihtá Beaivvážii guhte dieđusge bidjá stuora návccaid buvttadussii ja dasa gal duođai illuda. “Jurddaš mat dál áigot ámmát olbmot bargat mu čállosiin lávddis. De leat ámmát čuovga- ja lávdehábmejeaddjit, neavttárat, goarrut, teknihkkarat j.n.a.. Ja vel guhkes čájálmasmátkkošteamit maŋŋel álgočájálmasa, sihke Suoma, Norgga ja maiddái Ruoŧa bealde. Mun gal vuoiga illudan”, lohká Broch Johansen. Son sihke illuda ja ballá veaháš maid. Son lea bargan teavsttain 2008 rájes, rievdadan ja hilgon osiid, muhto dál lea viimmat ollašuvvan. “Diehttelasat lea veaháš issoras dovdu, go jurddaša maid olbmot oaivvildit bihtá birra, muhto mun luohtán bagadallái Mette Brantzegii  ja su bargovuohkái, nu ahte doaivvun dat manná bures”, lohka Broch Johansen. Su mielas lea sihke gelddolaš ja maid veaháš issoras oaidnit mot neavttáriid deivet iežaset rolla mihtilmasvuođaid, nu go son ieš lea oaivvildan čálidettiin (buvttadusjoavku govas lea eanes olbmot buvttadusas, dehálaš olbmot geat eai leat govas leat neavttárguokta Ingá Márjá Sarre ja Anitta Suikkari, ja čálli ieš, Siri Broch Johansen – govven Aslak Mikal Mienna).

Čájálmasas guovddáš olbmot:

Čálli: Siri Broch Johansen
Bagadalli: Mette Brantzeg
Lávde-/bivttashábmen: Erik Annar Evensen
Čuovgahábmen: Morten Reinan
Neavttárat: Áilloš, Anitta Suikkari, Ingá Márjá Sarre, Ánte Siri, Niillas Holmberg, Espen Østman.

Čájálmas bistá sullii 75 min. Fuom! Čájálmas simulantekstejuvvo sámegillii/suomagillii/dárogillii.

Das eanet dieđut čájálmasa birra, mátki ja eará.

Posterimage (c), Mienna/Beaivváš