Eanet merihttajovvon lávdehábmejeaddji Norggas ii gal árvideames gávdno. Son lea bargan dain stuorimus lávddiin, miehta máilmmi. Dal lea John-Kristian Alsaker vuohččan Beaivvážis ja hábme soaiggus Silbajávri čájálmassii lávddi. Dá gurutbealde ovttas teknihkkarin Olav Johan Eira:ain (dát govva ja muđui eará govat, Mienna/Beaivváš).
John-Kristian Alsakeris lea guhkes (ja rikkis) bargoduogáš; Nationalteáhtera siidduin lea čállojuvvon earret eará ahte lávdehábmejeaddjin lea doaibman “…sihke našunalalaččat ja gaskariikkalaččat, teáhterin, operain, filmmain ja TVas.” Sii čállet maid: “Son hábmii lávddi Lillehammer OG rahpamii ja loahpahan dilálašvuhtii ja bargá dal eanas Norgga lávddiin. Son lea gudnejahttojuvvon máŋggaid bálkkašumiin, nu mot o.m.d. amerihká Emmy-bálkkašumiin, go barggai Phantom of the Opera filmmas.”.Dal lea Beaivvážis ja hábme Silbajávri čájálmasa lávddi, ja dá govas ovttas buvttadusteknihkkariiguin Ole Tomas Hætta, Bernt Morten Bongo ja Olav Johan Eira. 
Son lea bargan ea. ea. neavttáriiguin Jessica Lange ja Burt Lancaster. Dál hábme ja ráhkada dan soigosii, balddehahtti lávddi, mas neavttárat Elle-Máijá Tailfeathers, Nils Rune Utsi (Slincraze), Ánte Siri, Inga Márjá Sarre, Anitta Suikkari, Egil Keskitalo ja Mary Sarre, galget balddáhallat gehčiid. Dá govas vuolabealde leat buot Silbajávri čájálmasa neavttárat, oktan Inga Juuso:in gii lea luoikkahan jiena čájálmassii.
