Golggotmánu 5. beaivvi čájehuvvo “Pippi Nallesuohkku” vuosttaš geardde ja dan maŋŋel lea čájálmasmátki davvisámis. Čájálmasa bagadalli lea Elle Sofe Sara (ovdal Henriksen), ja dát lea su vuosttaš teáhterčájálmasbagadallan. Dá Elle Sofe, ovttas neavttárguoktain Sarakka Gaup ja Marte Fjellheim Sarre, guhte neaktiba Tommy ja Pippi. Earret dát, de dás oainnát geat muđui leat dal bargame ollašuhttit čájálmasa ja maiddái dieđut čájálmasa birra muđui.
Sámi Našunálateáhter Beaivváš lea vuosttaš sámi lávdi gos Pippi Nallesuohkku čájehuvvo, ja lea Marte Fjellheim Sarre gii galgá neaktit máilmmi gievrramus nieiddaža. Son illuda neaktit vuosttaš sámegielat Pippi ja son maid illuda go dákkár mávssolaš muitalus, maid Pippi ovddasta, dál galgá čájehuvvot sámi mánáide ja nuoraide. Marte mielas lea dehálaš ahte mánát ja maiddái rávisolbmot besset vásihit dan Pippi geainna leat oahpásnuvvan girjjiin ja filmmain. “- Mu mielas lea hástalussan neaktit su, muhto dajan nu go son ieš livččii dadjan: Dán gal in leat goasse ovdal bargan, muhto gal mun birgen aŋkke!”
“Pippi Nallesuohku” máinnas čállojuvvui 1941. Karin – Astrid Lindgrena nieiddaš – siđai eatni muitalit muhtin nieiddaža birra man namma lea Pippi Nallesuohkku. Lindgren fertii geardduhit muitalusa ohpihii. Dasto čálii son sullii 40 girjji – govvagirjjiid ja teáhterbihtáid ja lávlagiid. Girjjit leat jorgaluvvon máŋggaid gielaide. Máilmmi gievrramus nieiddaš lea movttiidahtán máŋggaid buolvvaid mánáid miehtá máilmmi, ja lea ain lihkka ráhkis ja áigeguovdil midjiide go son lei 70 dás ovdal. Ja viimmat čájehuvvo“Pippi Nallesuohkku” maid sámegillii!
Saltkråkan eaiggáda ja hálddaša buot rivttiid Astrid Lindgrena ja su girjjiid oktavuođas.